OPEK+ mamlakatlari 2021-yil boshidan neft qazib chiqarishni asta-sekinlik bilan ko‘paytirishga kelishib oldi. Bu haqda kelishuv ishtirokchilaridan biri — Qozog‘iston energetika vazirligi ma’lum qildi, deb yozadi Meduza.
Hozir OPEK+ mamlakatlari kuniga bazaviy darajadan 7,7 million barrelga kamroq neft ishlab chiqarmoqda. Yanvardan boshlab umumiy qazib chiqarish kuniga 500 ming barrelga oshiriladi va shu tariqa, bazaviy darajadan 7,2 million barrelga kam bo‘ladi.
Qozog‘iston energetika vazirligida qayd etishlaricha, keyinroq qazib chiqarish hajmi har oyda qayta ko‘rib chiqilishi mumkin.
Rossiya energetika vaziri Aleksandr Novak ta’kidlashicha, Rossiya umumiy ko‘paytirish doirasida neft qazib chiqarishni kuniga 125 ming barrelga oshirish imkoniyatiga ega bo‘ladi.
OPEK+ mamlakatlari bahorda neft narxining keskin tushib ketishi fonida qazib chiqarish hajmini rekord darajada — kuniga 9,7 million barrelga kamaytirish haqida kelishib olgan edi. Bu kelishuv uch oy amal qildi, shundan so‘ng kamayish 7,7 million barrel darajasida qayd etildi.
Dastlab yanvardan qisqarish 5,8 million barrelni tashkil etishi ko‘zda tutilgan edi, ammo koronavirusning ikkinchi to‘lqini hamda uning natijasida OPEK+ mamlakatlarida ishlab chiqarish pasayib ketishi fonida kelishuvni qayta ko‘rib chiqib, qazib chiqarishni bunchalik keskin oshirmaslikka qaror qilindi.
Izoh (0)