Россия ҳукумати коронавирусдан ўлим статистикасини яширмайди. Тезкор штаб ва «Росстат» маълумотларидаги фарқлар турли хил ҳисоблаш усуллари билан боғлиқ. Бу ҳақда Россия бош вазири ўринбосари Татьяна Голикова маълум қилди, деб ёзмоқда Meduza.
«Баҳорда ҳам, ҳозирда ҳам Россия ҳудудида фаолият юритаётган баъзи ҳурматли хорижий оммавий ахборот воситалари Россияда қайд этилаётган ўлим статистикаси ишончсиз деб даъво қилмоқда. Айтмоқчиманки, тезкор штаб маълумотлари ҳам, ‘Росстат’ маълумотлари ҳам ишончли», — дея маълум қилган Голикова.
Голикованинг сўзларига кўра, штабнинг кунлик статистик маълумотларига фақат илгари ПЗР тести натижаси ижобий чиққан одамларнинг ўлими киритилади. «Росстат» статистикасига коронавирус ўлимнинг асосий ёки қўшимча сабаби сифатида аниқланган барча ҳолатлар киритилади.
Тезкор штабнинг кунлик маълумотлари «Росстат»нинг анча кейин эълон қилинадиган статистикасидан деярли уч марта фарқ қилади. Шундай қилиб, 1 октябргача тезкор штаб маълумотларига кўра, коронавирусдан 20,7 минг киши, «Росстат» маълумотларига кўра — 55,6 минг киши вафот этган.
Ортиқча ўлим маълумотлари асосида тузилган коронавирусдан ўлганлар сони бўйича мустақил ҳисоб-китоблар ҳатто «Росстат» маълумотларидан ҳам сезиларли даражада фарқ қилади. 1 октябрга қадар Россияда ортиқча ўлим 106 минг кишини ташкил этди. Ушбу ўлимларнинг тахминан 80 фоизи тўғридан-тўғри коронавирус билан боғлиқ бўлиши мумкин.
Аввалроқ Россияда пандемия бошланганидан буён ортиқча ўлим ҳолати 120 минг кишини ташкил этгани, бу тезкор штабнинг COVID-19 борасидаги маълумотларидан тўрт баробарга кўп эканлиги ҳақида хабар берилганди.
Изоҳ (0)