O‘zbekiston o‘n yil davomida umumiy quvvati 5000 megavatt bo‘lgan quyosh elektr stansiyalari (QES) qurishni rejalashtirmoqda, deya xabar bermoqda Energetika vazirligi.
Qayd etilishicha, 2021-yil oxiriga qadar O‘zbekistonda har biri 100 megavatt quvvatga ega ikkita QESni foydalanishga topshirish rejalashtirilgan.
Mazkur yo‘nalishda vazirlik Jahon banki guruhiga kiruvchi Xalqaro moliya korporatsiyasi (XMK) ishtirokida davlat-xususiy sheriklik dasturi asosida quyosh elektr stansiyalarini qurish bo‘yicha “Scaling solar” loyihasi ustida ish olib bormoqda. XMK quyosh energiyasi sohasidagi loyihalarni tanlash va tender o‘tkazishda yordam berish bo‘yicha yetakchi maslahatchi tashkilot sifatida jalb etilgan.
XMK ko‘magida 2019-yil O‘zbekistonda xalqaro tender tanlovlarining birinchi bosqichi tashkil etilib, uning natijalari 4-oktabr kuni e’lon qilindi. Tender Navoiy viloyatida 100 megavatt quvvatli birinchi QES qurish maqsadida o‘tkazilgan.
“Xalqaro tanlovning dastlabki bosqichida Hindiston, Ispaniya, Xitoy, Norvegiya, BAA, Rossiya, Saudiya Arabistoni, Fransiya, Janubiy Afrika Respublikasi, Janubiy Koreya va Yaponiyadan 23 ta kompaniya ishtirok etdi, shulardan 11 ta kompaniya dastlabki saralash tanlovidan o‘tdi”, – deydi Energetika vazirligi Qayta tiklanuvchi energiya manbalari asosida generatsiyani rivojlantirish boshqarmasi boshlig‘i Abdulla Otaboyev.Ma’lum qilinishicha, tijorat takliflari “Acwa Power” (Saudiya Arabistoni), “Jinko Power” va “Aljoimah Energy & Water Consortium” (XXR/ Saudiya Arabistoni), “Masdar” (BAA), “TBEA Xinjianing Sunoasis Co Ltd” (XXR) va “Total Eren” (Fransiya) kompaniyalari tomonidan taqdim etilgan.
Tender komissiyasi ishtirokchilarning texnik, tijorat takliflarini o‘rganish va baholash natijalariga ko‘ra, BAAning “Masdar” kompaniyasini tanlov birinchi bosqichi g‘olibi deb e’lon qildi. Mazkur kompaniya tarif bo‘yicha 1 kilovatt/soat ishlab chiqarilgan elektr energiyasini 2,679 sentga baholagan.
Loyihani moliyalashtirish Xalqaro tiklanish va taraqqiyot bankining 5,1 million dollargacha miqdordagi kafolati hamda XMKning 41 million dollargacha miqdordagi qarz mablag‘lari hisobiga amalga oshirilmoqda. Loyiha, shuningdek, Jahon bankining O‘zbekistondagi birinchi kafolatli operatsiyasi bo‘ladi.
“Masdar” Abu-Dabi hukumatining “Mubadala Investment Company” kompaniyasining sho‘ba korxonasi hisoblanadi. U qayta tiklanadigan energiya ishlab chiqarishni rivojlantirishga ixtisoslashgan yetakchi xalqaro kompaniyalardan biridir.
Kompaniya tomonidan amalga oshirilgan investitsiyaviy loyihalar portfeli 4000 megavattdan ortiq hajmda qayta tiklanadigan manbalardan elektr energiyasi ishlab chiqarishga ixtisoslashgan quvvatlarni o‘z ichiga olgan.
Shuningdek, “Masdar” kompaniyasi Navoiy viloyatida quvvati 500 megavatt bo‘lgan shamol elektr stansiyasini loyihalashtirish, qurish va undan foydalanish loyihasini amalga oshiradi.
Yangi obyektni qurish ishlarini 2021-yil oxirigacha boshlash ko‘zda tutilgan. 2023-yil aprel oyida ishlab chiqarish quvvatlarining birinchi bosqichi (250 megavattgacha) va 2024-yil oxiriga qadar barcha quvvatlarni foydalanishga topshirish rejalashtirilgan.
Avvalroq O‘zbekistonning uzoq hududlarini kichik quyosh elektr stansiyalari yordamida suv va elektr energiyasi bilan ta’minlash rejalashtirilayotgani va Qoraqalpog‘istonda shamol elektr stansiyalari qurilishi bo‘yicha tender e’lon qilingani haqida xabar berilgandi.
Izoh (0)