Andijon viloyatida 332 ming 649 nafar iste’molchining elektr energiyadan 248 milliard so‘m qarzdorligi mavjud. Bu haqda viloyat hududiy elektr tarmoqlari korxonasi direktori ma’lum qildi, deya xabar berdi “Daryo” muxbiri Umidjon Mamarasulov.
Korxona direktori Ahadjon Jo‘rayevning aytishicha, elektr energiyasi ta’minotidagi uzilishlarning sababi nafaqat elektr ta’minoti korxonalariga, balki iste’molchilarning o‘zlariga ham bog‘liq. Ayni paytda viloyatdagi iste’molchilarning foydalanilgan elektr energiyadan debitor qarzdorligi 273 milliard so‘mni tashkil qiladi. Qarzlarning o‘z vaqtida to‘lanmasligi oqibatida yil boshiga nisbatan qarzdorlik 37 milliard so‘mga ortgan.
“Bugungi kunda viloyatimizda 621 ming 348 nafar iste’molchi mavjud bo‘lib, shundan 332 ming 649 nafarining 248 milliard so‘m qarzdorligi mavjud. Shundan 29 ming iste’molchining 1 million so‘mdan 3 million so‘mgacha qarzdorligi bor. Shuningdek, 6 ming nafar iste’molchining esa 3 milliondan 5 milliongacha, 3 ming nafarida esa 5 million so‘mdan yuqori bo‘lgan qarzdorlik mavjud. Qarzlar o‘z vaqtida to‘lanmagani sabab eskirgan uzatish tarmoqlari, transformator punktlaridagi almashtirish, ta’mirlash ishlarini o‘z vaqtida bajara olmayapmiz. Odatda korxonamiz tomonidan qilinadigan ishlarning barchasi undirilgan mablag‘lar hisobidan amalga oshiriladi”, — deydi Ahadjon Jo‘rayev.
Ta’kidlanishicha, debitor qarzdorlikni kamaytirish maqsadida bir qator ishlar amalga oshirilgan. Jumladan, qarzdorligi mavjud iste’molchilarni tarmoqdan uzish uchun 53 ta o‘chirish guruhi tashkil qilingan. Ular tomonidan 2020-yilning sentabr—noyabr oylari davomida 7 ming 980 nafar iste’molchi tarmoqdan uzilgan.
Korxona direktorining o‘rinbosari Dilmurodjon Mavlonovning qo‘shimcha qilishicha, oktabr oyining ikkinchi o‘n kunligida havo keskin sovib ketishi natijasida elektr energiyasiga bo‘lgan talab qariyb 1,5 baravar oshgan. Natijada tizimda quvvat yetishmovchiligi paydo bo‘lgan.
“Aniq raqamlarni keltiradigan bo‘lsak, korxona tomonidan viloyatimizdagi iste’molchilarga 2019-yilning noyabr oyida 422 million 522 ming kVt soat elektr energiyasi yetkazib berilgan. Joriy yilning noyabr oyida esa ushbu ko‘rsatkich 452 million 73 ming kVt soatni tashkil etmoqda. Raqamlardan anglash mumkinki, oylik iste’mol o‘tgan yilga nisbatan oshgan”, — dedi Dilmurodjon Mavlonov.
Avvalroq Energetika vazirligi matbuot xizmati 2020-yilda elektr energiyasidagi uzilishlar soni va davomiyligi 2019-yilga nisbatan ikki baravar kamayganini ma’lum qilgandi. Vazirlik 2020—2021-yillar kuz-qish mavsumida Namangan, Andijon va Farg‘ona viloyatlarida gaz hamda elektr ta’minoti hajmi oshirilishini bildirgan.
O‘zbekistonda kuzatilayotgan elektr ta’minotidagi uzilishlarga Energetika vazirligi energiya iste’moli ortganini sabab qilib ko‘rsatgan.
Vazirlik o‘tgan yili ham elektr energiyasi tizimidagi uzilishlar va nosozliklar sabablari borasida shu kabi izoh bergandi. “Elektr energiyasiga bo‘lgan ehtiyojning keskin ortishi kuzatilgan paytda hatto rivojlangan mamlakatlarda ham iste’mol va ishlab chiqarish o‘rtasidagi energiya balansini ta’minlash juda qiyin vazifa bo‘lib qolmoqda. Bunda katta avariyalarning va butun mamlakatda hamma iste’molchilarning elektrsiz qolishining oldini olish uchun elektr energiyasi ta’minotida uzilishilar qilishga to‘g‘ri keladi”, — degan edi vazirlik.
2019-yilning noyabr oyida bosh vazir Abdulla Aripov gaz va elektr energiyasining uzilishi bilan bog‘liq vaziyatni sharmandali holat deb atagan, gaz va elektr energiya yetkazib beruvchilar o‘z ishlariga mas’uliyat bilan qarashmayotganini ta’kidlagandi.
Izoh (0)