Андижон вилоятида 332 минг 649 нафар истеъмолчининг электр энергиядан 248 миллиард сўм қарздорлиги мавжуд. Бу ҳақда вилоят ҳудудий электр тармоқлари корхонаси директори маълум қилди, дея хабар берди «Дарё» мухбири Умиджон Мамарасулов.
Корхона директори Аҳаджон Жўраевнинг айтишича, электр энергияси таъминотидаги узилишларнинг сабаби нафақат электр таъминоти корхоналарига, балки истеъмолчиларнинг ўзларига ҳам боғлиқ. Айни пайтда вилоятдаги истеъмолчиларнинг фойдаланилган электр энергиядан дебитор қарздорлиги 273 миллиард сўмни ташкил қилади. Қарзларнинг ўз вақтида тўланмаслиги оқибатида йил бошига нисбатан қарздорлик 37 миллиард сўмга ортган.
«Бугунги кунда вилоятимизда 621 минг 348 нафар истеъмолчи мавжуд бўлиб, шундан 332 минг 649 нафарининг 248 миллиард сўм қарздорлиги мавжуд. Шундан 29 минг истеъмолчининг 1 миллион сўмдан 3 миллион сўмгача қарздорлиги бор. Шунингдек, 6 минг нафар истеъмолчининг эса 3 миллиондан 5 миллионгача, 3 минг нафарида эса 5 миллион сўмдан юқори бўлган қарздорлик мавжуд. Қарзлар ўз вақтида тўланмагани сабаб эскирган узатиш тармоқлари, трансформатор пунктларидаги алмаштириш, таъмирлаш ишларини ўз вақтида бажара олмаяпмиз. Одатда корхонамиз томонидан қилинадиган ишларнинг барчаси ундирилган маблағлар ҳисобидан амалга оширилади», — дейди Аҳаджон Жўраев.
Таъкидланишича, дебитор қарздорликни камайтириш мақсадида бир қатор ишлар амалга оширилган. Жумладан, қарздорлиги мавжуд истеъмолчиларни тармоқдан узиш учун 53 та ўчириш гуруҳи ташкил қилинган. Улар томонидан 2020 йилнинг сентябрь—ноябрь ойлари давомида 7 минг 980 нафар истеъмолчи тармоқдан узилган.
Корхона директорининг ўринбосари Дилмуроджон Мавлоновнинг қўшимча қилишича, октябрь ойининг иккинчи ўн кунлигида ҳаво кескин совиб кетиши натижасида электр энергиясига бўлган талаб қарийб 1,5 баравар ошган. Натижада тизимда қувват етишмовчилиги пайдо бўлган.
«Аниқ рақамларни келтирадиган бўлсак, корхона томонидан вилоятимиздаги истеъмолчиларга 2019 йилнинг ноябрь ойида 422 миллион 522 минг кВт соат электр энергияси етказиб берилган. Жорий йилнинг ноябрь ойида эса ушбу кўрсаткич 452 миллион 73 минг кВт соатни ташкил этмоқда. Рақамлардан англаш мумкинки, ойлик истеъмол ўтган йилга нисбатан ошган», — деди Дилмуроджон Мавлонов.
Аввалроқ Энергетика вазирлиги матбуот хизмати 2020 йилда электр энергиясидаги узилишлар сони ва давомийлиги 2019 йилга нисбатан икки баравар камайганини маълум қилганди. Вазирлик 2020—2021 йиллар куз-қиш мавсумида Наманган, Андижон ва Фарғона вилоятларида газ ҳамда электр таъминоти ҳажми оширилишини билдирган.
Ўзбекистонда кузатилаётган электр таъминотидаги узилишларга Энергетика вазирлиги энергия истеъмоли ортганини сабаб қилиб кўрсатган.
Вазирлик ўтган йили ҳам электр энергияси тизимидаги узилишлар ва носозликлар сабаблари борасида шу каби изоҳ берганди. «Электр энергиясига бўлган эҳтиёжнинг кескин ортиши кузатилган пайтда ҳатто ривожланган мамлакатларда ҳам истеъмол ва ишлаб чиқариш ўртасидаги энергия балансини таъминлаш жуда қийин вазифа бўлиб қолмоқда. Бунда катта аварияларнинг ва бутун мамлакатда ҳамма истеъмолчиларнинг электрсиз қолишининг олдини олиш учун электр энергияси таъминотида узилишилар қилишга тўғри келади», — деган эди вазирлик.
2019 йилнинг ноябрь ойида бош вазир Абдулла Арипов газ ва электр энергиясининг узилиши билан боғлиқ вазиятни шармандали ҳолат деб атаган, газ ва электр энергия етказиб берувчилар ўз ишларига масъулият билан қарашмаётганини таъкидлаганди.
Изоҳ (0)