Shavkat Mirziyoyev 4-dekabr, juma kuni Toshkent metallurgiya zavodining ochilishiga bag‘ishlangan tantanali tadbirlar doirasida Rossiya sanoat va savdo vaziri Denis Manturov boshchiligidagi delegatsiyani qabul qildi.
Prezident matbuot xizmatining xabar berishicha, davlat rahbari poytaxt hududida amalga oshirilgan metallurgiya mahsulotlari ishlab chiqarish bo‘yicha yirik va zamonaviy korxonani tashkil etish loyihasi O‘zbekiston va Rossiya kompaniya va banklari o‘rtasidagi samarali hamkorlikning namunasi ekanini katta mamnuniyat bilan qayd etdi.
Ushbu zavod 4-dekabr kuni ochilishi haqida Rossiyaning “Metprom” muhandislik-qurilish guruhi prezidenti Andrey Deyneko ma’lum qilgandi. Mazkur zavodni barpo etish 2017-yil fevralda boshlangan bo‘lib, qurilish ishlariga 420 million dollar sarflangan.
Qayd etilishicha, zavodning vujudga kelishi keyingi yillarda ikki tomonlama savdo-iqtisodiy hamkorlikda jiddiy sifat o‘zgarishlari kuzatilayotganidan ham dalolat beradi.
Denis Manturov samimiy qabul uchun O‘zbekiston rahbariga minnatdorlik bildirdi hamda Vladimir Putinning salomi va eng ezgu tilaklarini yetkazdi.
Uchrashuvda ustuvor qo‘shma dastur va loyihalarning borishi ko‘rib chiqildi, amaliy hamkorlikni kengaytirish borasidagi rejalar muhokama qilindi. Mashinasozlik, agrosanoat, farmatsevtika, yengil va oziq-ovqat sanoati, ko‘plab boshqa tarmoqlarda yuqori texnologik ishlab chiqarish quvvatlarini tashkil etishda ikki mamlakatning yetakchi korxonalari o‘rtasidagi kooperatsiya loyihalarini ishlab chiqish va ilgari surish masalalariga alohida e’tibor qaratildi.
Eslatib o‘tamiz, Shavkat Mirziyoyev 2-dekabr kuni O‘zbekistonda amaliy tashrif bilan bo‘lib turgan Rossiya prezidenti administratsiyasi rahbarining o‘rinbosari Dmitriy Kozak boshchiligidagi delegatsiyani qabul qilgandi.
30-noyabr kuni esa Prezident Vladimir Putin bilan telefon orqali muloqot qilib, 2020-yil dekabrida videoanjuman shaklida o‘tkazilishi rejalashtirilgan O‘zbekiston raisligidagi MDH sammitiga tayyorgarlik ko‘rish masalasini muhokama qilgan edi.
Izoh (0)