Samarqand viloyati hokimligi magistrlar uchun 1 mln so‘mlik stipendiya e’lon qildi

Samarqand viloyati hokimligi magistratura bosqichida tahsil olayotgan talabalar uchun stipendiya joriy qildi. Stipendiya dasturida Samarqand viloyatida joylashgan oliy ta’lim muassasalarida o‘qiyotgan O‘zbekistonning barcha fuqarolari ishtirok eta oladi.

Kelib tushgan arizalar ichidan 10 nafar g‘olib saralab olinadi va ularga 6 oy mobaynida har oy 1 million so‘mdan stipendiya beriladi.

Stipendiya dasturida ishtirok etish uchun davlat granti yoki to‘lov-kontrakt asosida o‘qishning ahamiyati yo‘q, bunga cheklov qo‘yilmagan. Shuningdek, barcha mutaxassislik magistrlari qatnashishi mumkin.

G‘oliblarni saralashda nomzodning a’lo o‘qishi, xorijiy tillarni bilishi, ijtimoiy hayotda faolligi va boshqa jihatlar inobatga olinadi.

Arizalar 2020-yilning 31 dekabriga qadar “www.metsenat.uz” sayti orqali qabul qilinadi.

Eslatib o‘tamiz, bugungi kunga qadar “Metsenat.uz” loyihasida yana uchta ta’lim granti e’lon qilingan edi. Bular:

• Yoshlar ishlari agentligi, Yoshlar ittifoqi va “Mehrli qo‘llar” xayriya fondi tomonidan barcha talabalar uchun jami 400 million so‘mlik grant (ariza topshirishning oxirgi muddati 10-dekabr);
• “Xushnudbek.uz” Telegram kanali tomonidan Toshkent davlat yuridik universiteti talabalari uchun jami 30 million so‘mlik grant (ariza topshirishning oxirgi muddati 14-dekabr);
• “Najot ta’lim” markazi tomonidan tibbiyot sohasida o‘qiyotgan xotin-qizlar uchun jami 15 million so‘mlik grant (ariza topshirishning oxirgi muddati 2021-yil 10-yanvar).

Eslatib o‘tamiz, O‘zbekistonda ilk marotaba talabalar uchun ta’lim grantlari hamda stipendiyalar e’lon qilishga mo‘ljallangan www.metsenat.uz loyihasi 23-noyabr kuni ishga tushdi.

Loyiha bir guruh jamoatchilik faollarining tashabbusi bilan tashkil qilingan. Loyihadan maqsad — O‘zbekistondagi metsenatlarni jalb qilgan holda ehtiyojmand va iqtidorli talabalarning to‘lov-kontraktini to‘lashga yordam berish, shuningdek, stipendiyalar e’lon qilishdan iborat.

Loyiha muallifi Xushnudbek Xudayberdiyevning ma’lum qilishicha, “Metsenat.uz” ijtimoiy loyiha bo‘lib, undan hech qanday tijoriy maqsad ko‘zlanmagan.

Saytning ishlash prinsipi oddiy. Saytda talabalar ro‘yxatdan o‘tib, o‘zlari haqidagi ma’lumotlarni kiritadi va metsenatlar tomonidan e’lon qilingan grant yoki stipendiyalarga onlayn ariza topshiradi.