Qo‘qondagi “Shedevr” choyxonasida 2020-yil 5-fevral kuni kechasi bezorilik va odam o‘ldirishga suiqasd qilish jinoyatlari sodir etilgan, holat yuzasidan 30 nafar shaxsga nisbatan qamoqqa olish tarzida ehtiyot chorasi qo‘llanilgandi. O‘zAning yozishicha, 3-dekabr, payshanba kuni Jinoyat ishlari bo‘yicha Farg‘ona viloyat sudi Qo‘qon shahridagi “Shedevr” va Dang‘ara tumanidagi “Marokash” nomli choyxonalarda sodir etilgan jinoyatlar va ular bilan bog‘liq boshqa jinoyatlar bo‘yicha ayblov hukmini chiqargan.
Dastlabki tergov organi tomonidan 37 nafar shaxsga nisbatan Jinoyat kodeksining tegishli moddalari bilan ayb e’lon qilingan jinoyat ishi sud majlisida qonunda belgilangan 4 oy ko‘rildi.
Sudlanuvchilarning bir nafari suddan yashiringani uchun jinoyat ishining unga oid qismi alohida ish yurituviga ajratilib, ehtiyot chorasi qamoqqa almashtirilib, qidiruv e’lon qilingan edi.
O‘qotar qurolini qonunga xilof ravishda saqlash jinoyatini sodir etgan 1 nafar shaxsga avvalgi hukm bilan tayinlangan jazoning o‘talmagan qismini qisman qo‘shib 4 yil 4 oy muddatga, muqaddam sudlangan va sud hukmi bilan tayinlangan jazoni o‘tash davrida bezorilik jinoyati sodir etgan 9 nafar shaxsga nisbatan avvalgi hukm bilan tayinlangan jazoning o‘talmagan qismini qisman qo‘shib 5 yil muddatga, bezorilik jinoyati sodir etishda faol ishtirok etgan 4 nafar shaxsga avval sudlanmagan bo‘lsalar-da 5 yil, 2 nafariga esa 4 yil muddatga, boshqalarning undovi bilan bezorilik jinoyati sodir etgan 18 nafar shaxsga 3 yil muddatga ozodlikdan mahrum qilish jazolari tayinlangan va ularning 2 nafari sud zalida qamoqqa olingan.
“Tergov organi tomonidan yig‘ilgan va himoya tomonidan sudga taqdim etilgan dalillar to‘liq tekshirildi va ular ishga aloqadorligi, maqbulligi va ishonchiligi nuqtayi nazaridan baholandi.
Sud ayblov hukmi chiqarish bilan birgalikda jinoyat sodir etilishiga sabab bo‘lgan omillar va ularni bartaraf etish choralari hamda dastlabki tergov o‘tkazishda yo‘l qo‘yilgan ayrim kamchiliklar borasida xususiy ajrim ham chiqardi”, — deydi viloyat sudining sudyasi Rahmatjon Arapov.
Sud sudlanuvchilarning 1 nafarini bezorilik ruhida uchta odamni qasddan o‘ldirishga suiqasd qilish, qonunga xilof ravishda qurol saqlash va bezorilik jinoyatlari sodir etgan deb, avvalgi hukm bilan tayinlangan jazoning o‘talmagan qismini qisman qo‘shib 16 yil muddatga, o‘qotar qurolini qonunga xilof ravishda o‘tkazish jinoyatini sodir etgan 1 nafar shaxsga avvalgi hukm bilan tayinlangan jazoning o‘talmagan qismini qisman qo‘shib 10 yil 6 oy muddatga ozodlikdan mahrum qilish jazosini tayinlagan.
Eslatib o‘tamiz, 5-fevral kuni tungi vaqtda Qo‘qon shahridagi “Marokash” choyxonasida bir necha yoshlar o‘rtasida janjal yuz bergan. Shu hududda xizmat olib borayotgan IIB xodimlari mashinasini ko‘rgan yoshlar janjalni to‘xtatgan va “Shedevr” choyxonasida o‘zaro munosabatlarga oydinlik kiritishga uringan. Natijada, yoshlar o‘rtasidagi janjal ommaviy tus olgan. Janjal vaqtida 27 yoshli fuqaro tegishli tartibda ro‘yxatdan o‘tmagan qirqma ov miltig‘i bilan uch kishiga qarata ikki marotaba o‘q uzib, tan jarohati yetkazgan.
Izoh (0)