Rossiyaning Sankt-Peterburg shahri gubernatori Aleksandr Beglov Yangi yil bayramlari davrida koronavirusga qarshi cheklovlarni kuchaytiruvchi qarorni imzoladi, deb yozadi Meduza.
Shahar ma’muriyati saytiga joylangan qarorga ko‘ra, shaharda 30-dekabrdan 3-yanvargacha barcha umumiy ovqatlanish muassasalari yopiladi. Bu taqiq vokzal va aeroportlardagi kafelarga, shuningdek, ishlab chiqarish oshxonalariga tegishli emas. Ayni vaqtda umumiy ovqatlanish muassasalari mijozlar yeguliklarni uyga olib ketishi uchun ishlashi mumkin.
Bundan tashqari, 30-dekabrdan 10-yanvargacha muzey, teatr va ko‘rgazmalar yopiladi, konsertlar o‘tkazilmaydi.
Hozirgi vaqtda Sankt-Peterburgda kafe va barlar kechqurungi 11 dan keyin ishlashi mumkin emas.
Shaharda so‘nggi bir hafta mobaynida COVID-19’ga chalinish holatlarining barqarorlashuvi kuzatilmoqda. 26-noyabrdan buyon har kuni 3600—3700 ta kasallanish holati qayd etilmoqda.
Rossiyada 2-dekabr kuni qatorasiga ikkinchi kun koronavirusdan o‘limlar soni yuqori bo‘ldi — bir sutkada 589 kishi vafot etdi. 25 345 kishiga COVID-19 tashxisi qo‘yildi. Bu bir kun avvalgi ko‘rsatkichdan 1057 kishiga ko‘p. Mamlakatda kasallanganlarning umumiy soni 2 347 401 nafarga yetdi. Yangi aniqlangan kasallanish holatlarining eng ko‘pi Moskva (5191 ta) va Sankt-Peterburg (3684 ta) shaharlarida qayd etilgan.
Izoh (0)