Россиянинг Санкт-Петербург шаҳри губернатори Александр Беглов Янги йил байрамлари даврида коронавирусга қарши чекловларни кучайтирувчи қарорни имзолади, деб ёзади Meduza.
Шаҳар маъмурияти сайтига жойланган қарорга кўра, шаҳарда 30 декабрдан 3 январгача барча умумий овқатланиш муассасалари ёпилади. Бу тақиқ вокзал ва аэропортлардаги кафеларга, шунингдек, ишлаб чиқариш ошхоналарига тегишли эмас. Айни вақтда умумий овқатланиш муассасалари мижозлар егуликларни уйга олиб кетиши учун ишлаши мумкин.
Бундан ташқари, 30 декабрдан 10 январгача музей, театр ва кўргазмалар ёпилади, концертлар ўтказилмайди.
Ҳозирги вақтда Санкт-Петербургда кафе ва барлар кечқурунги 11 дан кейин ишлаши мумкин эмас.
Шаҳарда сўнгги бир ҳафта мобайнида COVID-19’га чалиниш ҳолатларининг барқарорлашуви кузатилмоқда. 26 ноябрдан буён ҳар куни 3600—3700 та касалланиш ҳолати қайд этилмоқда.
Россияда 2 декабрь куни қаторасига иккинчи кун коронавирусдан ўлимлар сони юқори бўлди — бир суткада 589 киши вафот этди. 25 345 кишига COVID-19 ташхиси қўйилди. Бу бир кун аввалги кўрсаткичдан 1057 кишига кўп. Мамлакатда касалланганларнинг умумий сони 2 347 401 нафарга етди. Янги аниқланган касалланиш ҳолатларининг энг кўпи Москва (5191 та) ва Санкт-Петербург (3684 та) шаҳарларида қайд этилган.
Изоҳ (0)