Fransiya sobiq prezidenti Valeri Jiskar d’Esten 94 yoshida vafot etdi, deya xabar bermoqda “RBK”. Bu haqda Le Figaro gazetasi uning yaqinlariga tayanib ma’lumot berdi, uni Europe 1 radiosi tasdiqladi.
Siyosatchi oilasining ma’lum qilishicha, u COVID-19 asoratlaridan vafot etgan.
Le Parisien nashri manbalariga ko‘ra, d’Esten sentabr o‘rtalarida o‘pka infeksiyasi bilan kasalxonaga yotqizilgan. Ikki oy o‘tib, 15-noyabr kuni sobiq prezident yana kasalxonaga tushgan.
D’Esten kardiologiya bo‘limiga yotqizilgan, uning o‘zi esa yurak yetishmovchiligi haqida gapirgan, deb yozadi La Nouvelle Republique. 20-noyabr kuni sobiq prezidentga kasalxonadan ruxsat berilgan va u Oton shahridagi (Luar va Sher departamenti) qarorgohiga qaytib kelgan.
d’Esten Fransiya prezidentlari orasida eng uzoq yashadi. 1962—1974-yillarda u respublika iqtisodiyot va moliya vaziri bo‘lib ishlagan. 1974-yilda u prezident saylovlarida g‘olib chiqib, 48 yoshida Yevropa mamlakatlarining eng yosh yetakchilaridan biriga aylandi.
Prezident lavozimida Jiskar d’Esten 1981-yilgacha qoldi. Uning prezidentligi davrida Fransiyada katta ko‘lamli davlat loyihalari, shu jumladan tezyurar poyezd yo‘llari va yangi atom elektr stansiyalari qurilishi amalga oshirildi. Shuningdek, bu davrda Fransiyada kinodagi siyosiy senzura bekor qilindi, saylov yoshi esa 21 dan 18 yoshgacha tushirildi. Uning prezidentligi chog‘ida mamlakatda homilani oldirish qonuniylashtirildi va ajrashish jarayoni soddalashtirildi.
Eslatib o‘tamiz, Fransiyaning yana bir sobiq prezidenti Jak Shirak 2019-yil 26-sentabr kuni 86 yoshida vafot etgan edi.
Mavzuga doir:
- Parijdagi Eyfel minorasi 16-dekabrdan tashrif buyuruvchilar uchun ochiladi
- Fransiya parlamenti politsiyachilarni suratga olishni taqiqlovchi qonun loyihasini kam-ko‘stini to‘ldirish uchun qaytarib oldi. U norozilik namoyishlariga sabab bo‘lgan edi
- Fotogalereya: Parijda Jak Shirak bilan vidolashuv marosimi bo‘lib o‘tdi
Izoh (0)