Interpol dunyoda uyushgan jinoyatchilar koronavirusga qarshi soxta vaksinalar tarqatishi yoki haqiqiy vaksinalarni o‘g‘irlashi mumkinligidan xavotirda ekanligini bildirdi. Bu haqda “Interfaks” xabar berdi.
“Huquq-tartibot organlari COVID-19’ga qarshi vaksinalar bilan bog‘liq jinoiy faollikning oshishiga iloji boricha yaxshiroq tayyorlanishi juda muhim”, — deya ma’lum qilgan Interpol bosh kotibi Yurgen Shtok.
Ma’lum qilinishicha, mazkur xavf munosabati bilan Interpol 194 ta a’zo mamlakatning huquq-tartibot organlariga tegishli ogohlantirish yuborgan.
Yurgen Shtokning qayd etishicha, jinoyat olami “vaksinalarni yetkazib berish zanjiriga kirib olish yoki uni uzishni”, shuningdek, soxta saytlar yordamida odamlarni chalg‘itishni, “salomatlik, hatto sog‘lik uchun jiddiy xavf tug‘dirishi mumkin bo‘lgan” soxta dorilarni taklif etishni rejalashtirmoqda. Uning ta’kidlashicha, jinoyatchilar “COVID-19’ga qarshi vaksinalarni soxtalashtirish, o‘g‘irlash yoki noqonuniy reklama qilish” bo‘yicha faollikni kuchaytirishni ko‘zlamoqda.
Shuningdek, jinoyatchilar katta ehtimol bilan koronavirusni aniqlash bo‘yicha qalbaki testlar ishlab chiqarish va tarqatishni yo‘lga qo‘yishi mumkin. Bundan tashqari, pandemiya fonida oddiy iste’molchilarga nisbatan kiber hujumlar kuchaydi. Tashkilot ma’lumotlariga ko‘ra, noqonuniy tibbiy mahsulotlar tarqatishda gumon qilinayotgan 3 mingta saytning 1,7 mingtasida foydalanuvchilarning ma’lumotlarini o‘g‘irlashga urinish qayd etilgan.
Avvalroq Buyuk Britaniya Pfizer va BioNTech kompaniyalari tomonidan yaratilgan koronavirusga qarshi vaksinadan foydalanishni ma’qullagan birinchi mamlakat bo‘lgani haqida xabar berilgandi.
O‘z navbatida, Pfizer kompaniyasi rahbari Albert Burla Buyuk Britaniya tomonidan vaksinadan foydalanishga ruxsat berilishi COVID-19 pandemiyasga qarshi kurashda “tarixiy palla” hisoblanishini ma’lum qilgan.
Ayni paytda AQSh va Yevropa Ittifoqida Pfizer va BioNTech tomonidan ishlab chiqilgan vaksinaning xavfsizligini baholash ishlari olib borilmoqda. Avvalroq mazkur kompaniyalar klinik sinovlarning yakuniy — uchinchi bosqichida vaksinaning samaradorligi 95 foizni tashkil etganini ma’lum qilgandi.
Izoh (0)