O‘zbekistonda o‘tgan 10 oyda rejadagidan 5 foizga ko‘p elektr energiyasi ishlab chiqarilgani ma’lum qilindi

O‘zbekistonda 2020-yilning o‘tgan 10 oyi davomida 48,5 milliard KVt/soat elektr energiyasi ishlab chiqarilgan, bu joriy rejaga nisbatan 5 foizga, 2019-yilning shu davriga nisbatan 7,5 foizga ko‘pni tashkil etmoqda. Bu haqda “Issiqlik elektr stansiyalari” AJ axborot xizmati rahbari Muhammadjon Bekmuhammedovga tayanib “Kun.uz” xabar berdi.

Ma’lum qilinishicha, 2019-yilda O‘zbekistondagi issiqlik elektr stansiyalari tomonidan 56,4 milliard KVt/soat elektr energiyasi ishlab chiqarildi. Bu miqdor 2015-yilga nisbatan 20 foizga oshganiga qaramay, iqtisodiyot tarmoqlari va aholi ehtiyojlari ortishi hisobiga 2030-yilga borib elektr energiyasiga bo‘lgan talab 2 barobarga o‘sishi kutilmoqda.

Bunda ko‘zda tutilayotgan ehtiyojlar uchun atom elektr stansiyasi va muqobil energiya manbalariga asoslangan elektrostansiyalar ishga tushirilishi ko‘zda tutilgan bo‘lsa-da, asosiy yuk IES zimmasiga to‘g‘ri kelmoqda.

Iste’mol ortishi hisobiga investitsiya loyihalari doirasida 2020-yil yakuniga qadar jami 1177 MVt yangi ishlab chiqarish quvvatlari ishga tushiriladi. Bugungi kunga qadar shundan 805 MVt energobloklar foydalanishga topshirilgan.

Bular – To‘raqo‘rg‘on IESda 450 MVtli ikkinchi, Taxiatosh IESda 280 MVtli birinchi bug‘-gaz qurilmalari ishga tushirildi hamda Sirdaryo IESda 6-energoblokning quvvati 75 MVtga oshirildi. Qolgan 375 MVtga teng quvvatlar yil yakuniga qadar foydalanishga topshirilishi rejalashtirilgan.

Ta’kidlanishicha, Energetika vazirligi tomonidan tasdiqlangan 2020—2030-yillarda “O‘zbekiston Respublikasini elektr energiyasi bilan ta’minlash konsepsiyasi”ga binoan, 2030-yilgacha 70 milliard KVt/soat elektr energiyasi ishlab chiqariladi.

Muhammadjon Bekmuhammedovning aytishicha, Taxiatosh IESda har birining quvvati 280 MVtga teng 2 ta bug‘-gaz qurilmasini bunyod etish bo‘yicha Janubiy Koreyaning Hyundai konsorsiumi ishtirokida umumiy qiymati 678,2 million dollarga teng xalqaro loyiha amalga oshirilmoqda.

“Birinchi bug‘-gaz qurilma ayni paytda sinov-test rejimida ishlamoqda. Ikkinchi qurilma ham yaqin kunlarda ishga tushiriladi.

Stansiyada 1 KVt tokni hosil qilish uchun sarflanayotgan 430,3 gramm yoqilg‘i o‘rniga yangi qurilmada bu miqdor 266 gramm KVt soatni tashkil etadi. Bu o‘z navbatida yiliga 488,6 million kubometr gazni tejash imkonini beradi.

Shu bilan birga, issiqlik energiyasining 139 ming gegakoloriyaga oshishi hisobiga qo‘shimcha ravishda 100 ta maktabni, 200 ta bolalar bog‘chasini, 10 ta yirik korxonani issiqlik bilan ta’minlash imkoniyati yaratiladi”, — deydi Bekmuhammedov.

Avvalroq To‘raqo‘rg‘on IESda avariyaviy o‘chish yuz berishi oqibatida Namangan viloyatining aksar hududlari elektrsiz qolgani, Taxiatosh IES sovuq kunlarda qariyb bir yarim kun ishlamay qolgani, Farg‘ona viloyatida elektr energiyasi ta’minotida 28 soatgacha uzilishlar kuzatilayotgani, Surxondaryoda elektr ta’minotida uzilishlar yuz bergani, Kelesdagi tug‘ruqxona elektr ta’minotida uzilish kuzatilgani haqida xabar berilgan edi.

Energetika vazirligi O‘zbekistonda elektr energiyasi ta’minotidagi uzilishlarning asosiy sababi havoning sovib ketishi natijasida elektr energiyasi iste’molining keskin ortishi ekanligini ma’lum qilgan.

Energetika vaziri Alisher Sultonov esa O‘zbekiston 30 yil davomida Markaziy Osiyo energiya taqsimlash tizimidan chiqishga harakat qilib, ko‘p narsani yo‘qotgani, jumladan, bu holat yirik stansiyalarning muddatidan avval eskirishiga sabab bo‘lganini aytgan.