Kelesdagi tug‘ruqxona elektr ta’minotida uzilish kuzatildi. Holat yuzasidan izoh berildi

Ijtimoiy tarmoqlarda “Keles ‘raddom’idagi holat: nimaga ‘raddom’larda svet yo‘q? Tug‘adigan ayollar nima qilsin? Yuqori turuvchi mutasaddilar qayerga qaramoqda?” nomli videoxabar tarqaldi. Video yuzasidan Toshkent hududiy elektr tarmoqlari korxonasi izoh berdi.

Qayd etilishicha, 2020-yilning 20-noyabr kuni soat 15:51 da To‘raqo‘rg‘on IESning 2 ta energobloki avariyaviy to‘xtagan. Shu bois mazkur stansiya orqali energotizimga yetkazib berilayotgan quvvat 600 megavattga kamayib ketgan.

Buning oqibatida Toshkent shahri va viloyati, Samarqand, Buxoro va Qashqadaryo viloyatlarida avtomatik ravishda cheklovlar kiritilgan.

Natijada soat 17:00 da “Toshkent tumani elektr ta’minoti korxonasi”ga qarashli avtomatlashtirilgan “L-Keles 35 kilovatt” tarmog‘ida kuchlanish ortib, simlarning qizib ketishi oqibatida tizim elektr ta’minoti 20 daqiqaga avtomatik tarzda o‘chgan. 30 daqiqadan so‘ng kamchilik bartaraf etilib, elektr ta’minoti tiklangan.

Xususan, Toshkent tumani markazida, jumladan, akusherlik kompleksida ham 20-noyabr kuni soat 17:00 da elektr ta’minotida avtomatik tarzda uzilish ro‘y bergan.

Bu vaqtda akusherlik kompleksida 96 ta bemor, 57 ta chaqaloq bo‘lgan. Bu vaqt ichida tug‘ruq yoki operatsiyalar o‘tkazilmagan. Ushbu holat bemor va chaqaloqlar sog‘ligiga salbiy ta’sir ko‘rsatmagan. Soat 17:32 da elektr ta’minoti qayta tiklangan.

O‘tgan 32 daqiqa davomida tug‘ruq holatlari yoki boshqa shoshilinch tez tibbiy yordam ko‘rsatishga ehtiyoj bo‘lmaganligi tufayli, akusherlik kompleksida elektr ta’minoti uzilgan paytda qo‘llaniladigan elektr toki uzatuvchi generatorni ishga tushirishga ehtiyoj tug‘ilmagan.

Avvalroq To‘raqo‘rg‘on IESda avariyaviy o‘chish yuz berishi oqibatida Namangan viloyatining aksar hududlari elektrsiz qolgani sababli Toshkent shahri va olti viloyatda elektr ta’minotida cheklovlar kiritilgan edi. 20-noyabr kuni IESda yuzaga kelgan nosozlik bartaraf etildi.