Ўзбекистонда 2020 йилнинг ўтган 10 ойи давомида 48,5 миллиард КВт/соат электр энергияси ишлаб чиқарилган, бу жорий режага нисбатан 5 фоизга, 2019 йилнинг шу даврига нисбатан 7,5 фоизга кўпни ташкил этмоқда. Бу ҳақда «Иссиқлик электр станциялари» АЖ ахборот хизмати раҳбари Муҳаммаджон Бекмуҳаммедовга таяниб «Kun.uz» хабар берди.
Маълум қилинишича, 2019 йилда Ўзбекистондаги иссиқлик электр станциялари томонидан 56,4 миллиард КВт/соат электр энергияси ишлаб чиқарилди. Бу миқдор 2015 йилга нисбатан 20 фоизга ошганига қарамай, иқтисодиёт тармоқлари ва аҳоли эҳтиёжлари ортиши ҳисобига 2030 йилга бориб электр энергиясига бўлган талаб 2 баробарга ўсиши кутилмоқда.
Бунда кўзда тутилаётган эҳтиёжлар учун атом электр станцияси ва муқобил энергия манбаларига асосланган электростанциялар ишга туширилиши кўзда тутилган бўлса-да, асосий юк ИЭС зиммасига тўғри келмоқда.
Истеъмол ортиши ҳисобига инвестиция лойиҳалари доирасида 2020 йил якунига қадар жами 1177 МВт янги ишлаб чиқариш қувватлари ишга туширилади. Бугунги кунга қадар шундан 805 МВт энергоблоклар фойдаланишга топширилган.
Булар – Тўрақўрғон ИЭСда 450 МВтли иккинчи, Тахиатош ИЭСда 280 МВтли биринчи буғ-газ қурилмалари ишга туширилди ҳамда Сирдарё ИЭСда 6-энергоблокнинг қуввати 75 МВтга оширилди. Қолган 375 МВтга тенг қувватлар йил якунига қадар фойдаланишга топширилиши режалаштирилган.
Республикада жами электр энергияси ишлаб чиқариш ҳажмидаги ИЭСнинг улуши қарийб 86 фоизни ташкил қилади.
Муҳаммаджон Бекмуҳаммедовнинг айтишича, Тахиатош ИЭСда ҳар бирининг қуввати 280 МВтга тенг 2 та буғ-газ қурилмасини бунёд этиш бўйича Жанубий Кореянинг Hyundai консорциуми иштирокида умумий қиймати 678,2 миллион долларга тенг халқаро лойиҳа амалга оширилмоқда.
«Биринчи буғ-газ қурилма айни пайтда синов-тест режимида ишламоқда. Иккинчи қурилма ҳам яқин кунларда ишга туширилади.
Станцияда 1 КВт токни ҳосил қилиш учун сарфланаётган 430,3 грамм ёқилғи ўрнига янги қурилмада бу миқдор 266 грамм КВт соатни ташкил этади. Бу ўз навбатида йилига 488,6 миллион кубометр газни тежаш имконини беради.
Шу билан бирга, иссиқлик энергиясининг 139 минг гегаколорияга ошиши ҳисобига қўшимча равишда 100 та мактабни, 200 та болалар боғчасини, 10 та йирик корхонани иссиқлик билан таъминлаш имконияти яратилади», — дейди Бекмуҳаммедов.
Мавзуга доир: Ўзбекистонда декабрь ойидан ишлаб чиқарилаётган электр энергияси ҳажми ошиши кутилмоқда
Энергетика вазирлиги Ўзбекистонда электр энергияси таъминотидаги узилишларнинг асосий сабаби ҳавонинг совиб кетиши натижасида электр энергияси истеъмолининг кескин ортиши эканлигини маълум қилган.
Энергетика вазири Алишер Султонов эса Ўзбекистон 30 йил давомида Марказий Осиё энергия тақсимлаш тизимидан чиқишга ҳаракат қилиб, кўп нарсани йўқотгани, жумладан, бу ҳолат йирик станцияларнинг муддатидан аввал эскиришига сабаб бўлганини айтган.
Изоҳ (0)