O‘zbekistonda dekabr oyidan ishlab chiqarilayotgan elektr energiyasi hajmi oshishi kutilmoqda. Bu haqda Energetika vaziri o‘rinbosari Sherzod Xo‘jayev “Kun.uz”ga bergan intervyusida ma’lum qildi.

Foto: “Daryo”

“Iste’mol ortishinini hisobga olib, oldimizga bir qator vazifalarni belgilab olganmiz. Xususan, investitsiya loyihalari doirasida yil yakuniga qadar jami 1250 megavatt yangi elektr energiyasi ishlab chiqarish quvvatlari ishga tushiriladi.

Bugungi kunda shundan 878 megavattli energobloklar foydalanishga topshirildi. Jumladan, To‘raqo‘rg‘on issiqlik elektr stansiyasida 450 megavattli ikkinchi, Taxiatosh issiqlik elektr stansiyasida 280 megavattli birinchi bug‘-gaz qurilmalari hamda 73 megavattli gidroelektr stansiya agregatlari tizimga ulandi. Sirdaryo issiqlik elektr stansiyasida oltinchi energoblokning quvvati 75 megavattga oshirildi. Qolgan 372 megavattga teng quvvatlar yil yakuniga qadar foydalanishga topshirilishi rejalashtirilgan”, — degan Sherzod Xo‘jayev.

Shuningdek, Taxiatosh issiqlik elektr stansiyasida birinchi 280 megavattli bug‘-gaz qurilmasi, Farg‘ona issiqlik elektr markazida 17 megavattli gaz turbina qurilmasi, Sirdaryo issiqlik elektr stansiyasida beshinchi energoblokning modernizatsiya ishlarini yakunlash natijasida quvvati 75 megavattga oshirilishini ta’kidlagan.

Energetika vaziri o‘rinbosarining aytishicha, hozirda Tolimarjon issiqlik elektr stansiyasida 800 megavattli hamda Angren issiqlik elektr stansiyasida 150 megavattli energobloklarda joriy ta’mir ishlari bajarilmoqda. Ta’mir ishlari noyabr oyida yakunlanadi va dekabr oyida qurilmalar ishga tushiriladi.

Avvalroq To‘raqo‘rg‘on IESda avariyaviy o‘chish yuz berishi oqibatida Namangan viloyatining aksar hududlari elektrsiz qolgani, Taxiatosh IES sovuq kunlarda qariyb bir yarim kun ishlamay qolgani, Farg‘ona viloyatida elektr energiyasi ta’minotida 28 soatgacha uzilishlar kuzatilayotgani, Surxondaryoda elektr ta’minotida uzilishlar yuz bergani, Kelesdagi tug‘ruqxona elektr ta’minotida uzilish kuzatilgani haqida xabar berilgan edi.

Energetika vazirligi O‘zbekistonda elektr energiyasi ta’minotidagi uzilishlarning asosiy sababi havoning sovib ketishi natijasida elektr energiyasi iste’molining keskin ortishi ekanligini ma’lum qilgan. Monopoliyaga qarshi kurashish qo‘mitasi so‘nggi paytlarda gaz va elektr muammolari yuz berayotgani bo‘yicha qo‘mita va uning huzuridagi agentlikka murojaat qilishni so‘ragan.

Tanzila Norboyeva gaz va elektr muammosi maxsus ko‘rib chiqilishi, yalpi majlisda ko‘tarilishi, Prezidentga axborot berilishini aytdi.