Turizmni rivojlantirish davlat qo‘mitasi raisi Aziz Abduhakimov O‘zbekiston otelyerlar Assotsiatsiyasi a’zolari — Toshkent shahrining eng yirik mehmonxonalari egalari va bosh menejerlari bilan uchrashuv o‘tkazdi. Bu haqda qo‘mita matbuot xizmati xabar berdi.
Qayd etilishicha, uchrashuvda Aziz Abduhakimov bugungi kunda mehmonxonalar faoliyatini jonlantirishi mumkin bo‘lgan ziyorat turizmini rivojlantirishga oid loyihalar ishlab chiqilayotganini ta’kidladi.
Uning so‘zlariga ko‘ra, loyiha doirasida Turkiya, Eron, Hindiston, Pokiston va Bangladeshning yetakchi diniy arboblari bilan O‘zbekistonga yangi sayyohlar oqimi tashrifini tashkil qilishga doir muzokaralar o‘tkazilgan.
Uchrashuv yakuniga ko‘ra, mehmondo‘stlik sohasi uchun imtiyoz va preferensiyalar muddatini 2021-yilning oxiriga qadar uzaytirish hamda sanitar norma va qoidalarning yagona tizimini tasdiqlashga oid qaror qabul qilindi.
Avvalroq Navoiyda loyiha qiymati 6 million dollar bo‘lgan dam olish maskani ish boshlagani, Jizzaxda Prezident qarori bilan xalqaro umummavsumiy tog‘-chang‘i kurorti, Xonobodda mineral suv ishlab chiqarish va dam olish zonasi tashkil etilishi hamda Toshkentning eski shahari “ochiq osmon ostidagi muzey”ga aylantirilishi haqida xabar berilgandi.
Izoh (0)