Ukrainada Turkiya kompaniyalari brendlari ostida sotilayotgan tekstil mahsulotlarining 80 foizi aslida O‘zbekistonda tayyorlangan. Bu haqda Ukrainaning O‘zbekistondagi elchisi Nikolay Doroshenko ma’lum qildi, deya xabar beradi “Daryo” muxbiri Azizbek Abduvaliyev.
Doroshenko 2020-yil 2-dekabr kuni Namanganda viloyat hokimi Shavkatjon Abdurazzaqov bilan uchrashdi. Muloqot davomida tekstil, turizm, tibbiyot, ta’lim, qishloq xo‘jaligi va sport yo‘nalishlaridagi hamkorlik masalalari muhokama qilindi.
—Mamlakatimizda Turkiya brendlari ostida sotilayotgan tekstil mahsulotlarining aksariyati aslida O‘zbekistonda tayyorlanayotganini yaxshi bilamiz. O‘zbekistonda esa Namangan viloyati to‘qimachilik sanoati markazi hisoblanadi. Shu bois to‘g‘ridan to‘g‘ri, vositachilarsiz aloqalarni yo‘lga qo‘yish, qo‘shma korxonalar ochish, Namangan tekstil mahsulotlarining Ukrainaga eksporti ulushini oshirish vaqti keldi deb hisoblayman, — dedi Nikolay Doroshenko.
Ukraina elchisi Namanganga tashrifi davomida qator mahalliy tekstil korxonalarida bo‘ldi, ularda tayyorlanayotgan mahsulotlar sifatiga yuqori baho berdi.
Ma’lumot uchun, bugungi kunda Namangan viloyatida 1700 dan ortiq tekstil korxonalari ro‘yxatdan o‘tgan. Ularda 50 ming kishi mehnat qilmoqda. 2020-yilning o‘zida viloyatdan xorijga 150 million dollarlik tekstil mahsulotlari eksport qilingan.
Izoh (0)