Germaniya kansleri Angela Merkel mintaqalar rahbarlari bilan majlis o‘tkazganidan keyin koronavirus bilan bog‘liq cheklovlar muddatini 10-yanvargacha uzaytirishni rejalashtirmoqda, deb yozadi “RBK”.
Merkelning so‘zlariga ko‘ra, COVID-19’ga chalinish holatlarini yetti kun ichida har 100 ming aholi uchun 50 tagacha kamaytirish maqsadi qo‘yilgan. Lekin bungacha “hali uzoq”, dedi u.
Bavariya bosh vaziri Markus Zyoder cheklovlarning uzaytirilishini “to‘g‘ri” qaror deb hisoblaydi. Uning ta’kidlashicha, koronavirus bilan bog‘liq vaziyat “hech ham yaxshilangani yo‘q, balki aksinchadir”.
Cheklovlarni uzaytirish mamlakatda COVID-19 oqibatidagi o‘limlar soni rekord darajada o‘sayotgan bir paytda rejalashtirilmoqda. Robert Kox instituti ma’lumotlariga ko‘ra, Germaniyada bir kecha-kunduzda 17 270 kishi koronavirusga chalingan, pandemiya boshidan buyon esa kasallanganlar soni 1 084 743 kishiga yetgan. So‘nggi 24 soat ichida 487 kishi, butun pandemiya davrida 17 123 kishi vafot etgan.
Noyabr boshidan buyon Germaniyada restoran va barlar yopiq — ular faqat uyga olib ketish uchun ishlamoqda. Teatr, kinoteatr, konsert zallari, fitness-klublar va kosmetik salonlar faoliyati to‘xtatilgan. Maktab va bog‘chalar, shuningdek, savdo markazlari ishlashda davom etmoqda. Noyabr oxirida Merkel cheklovlar 20-dekabrgacha uzaytirilishini aytgan edi.
Kansler cheklovlarga rioya qilinmasa, mamlakat yaqin haftalar ichida koronavirusning uchinchi to‘lqiniga duch kelishi mumkinligi haqida ogohlantirdi.
Izoh (0)