Германия канцлери Ангела Меркель минтақалар раҳбарлари билан мажлис ўтказганидан кейин коронавирус билан боғлиқ чекловлар муддатини 10 январгача узайтиришни режалаштирмоқда, деб ёзади «РБК».
Меркелнинг сўзларига кўра, COVID-19’га чалиниш ҳолатларини етти кун ичида ҳар 100 минг аҳоли учун 50 тагача камайтириш мақсади қўйилган. Лекин бунгача «ҳали узоқ», деди у.
Бавария бош вазири Маркус Зёдер чекловларнинг узайтирилишини «тўғри» қарор деб ҳисоблайди. Унинг таъкидлашича, коронавирус билан боғлиқ вазият «ҳеч ҳам яхшилангани йўқ, балки аксинчадир».
Чекловларни узайтириш мамлакатда COVID-19 оқибатидаги ўлимлар сони рекорд даражада ўсаётган бир пайтда режалаштирилмоқда. Роберт Кох институти маълумотларига кўра, Германияда бир кеча-кундузда 17 270 киши коронавирусга чалинган, пандемия бошидан буён эса касалланганлар сони 1 084 743 кишига етган. Сўнгги 24 соат ичида 487 киши, бутун пандемия даврида 17 123 киши вафот этган.
Ноябрь бошидан буён Германияда ресторан ва барлар ёпиқ — улар фақат уйга олиб кетиш учун ишламоқда. Театр, кинотеатр, концерт заллари, фитнесс-клублар ва косметик салонлар фаолияти тўхтатилган. Мактаб ва боғчалар, шунингдек, савдо марказлари ишлашда давом этмоқда. Ноябрь охирида Меркель чекловлар 20 декабргача узайтирилишини айтган эди.
Канцлер чекловларга риоя қилинмаса, мамлакат яқин ҳафталар ичида коронавируснинг учинчи тўлқинига дуч келиши мумкинлиги ҳақида огоҳлантирди.
Изоҳ (0)