Франция собиқ президенти Валери Жискар д’Эстен 94 ёшида вафот этди, дея хабар бермоқда «РБК». Бу ҳақда Le Figaro газетаси унинг яқинларига таяниб маълумот берди, уни Europe 1 радиоси тасдиқлади.
Сиёсатчи оиласининг маълум қилишича, у COVID-19 асоратларидан вафот этган.
Le Parisien нашри манбаларига кўра, д’Эстен сентябрь ўрталарида ўпка инфекцияси билан касалхонага ётқизилган. Икки ой ўтиб, 15 ноябрь куни собиқ президент яна касалхонага тушган.
Д’Эстен кардиология бўлимига ётқизилган, унинг ўзи эса юрак етишмовчилиги ҳақида гапирган, деб ёзади La Nouvelle Republique. 20 ноябрь куни собиқ президентга касалхонадан рухсат берилган ва у Отон шаҳридаги (Луар ва Шер департаменти) қароргоҳига қайтиб келган.
Д’Эстен Франция президентлари орасида энг узоқ яшади. 1962—1974 йилларда у республика иқтисодиёт ва молия вазири бўлиб ишлаган. 1974 йилда у президент сайловларида ғолиб чиқиб, 48 ёшида Европа мамлакатларининг энг ёш етакчиларидан бирига айланди.
Президент лавозимида Жискар д’Эстен 1981 йилгача қолди. Унинг президентлиги даврида Францияда катта кўламли давлат лойиҳалари, шу жумладан тезюрар поезд йўллари ва янги атом электр станциялари қурилиши амалга оширилди. Шунингдек, бу даврда Францияда кинодаги сиёсий цензура бекор қилинди, сайлов ёши эса 21 дан 18 ёшгача туширилди. Унинг президентлиги чоғида мамлакатда ҳомилани олдириш қонунийлаштирилди ва ажрашиш жараёни соддалаштирилди.
Эслатиб ўтамиз, Франциянинг яна бир собиқ президенти Жак Ширак 2019 йил 26 сентябрь куни 86 ёшида вафот этган эди.
Мавзуга доир:
Изоҳ (0)