Minnesota shtatida istiqomat qiluvchi oila 2014-yilda yangi Mitsubishi Mirage’ni sotib olgan. O‘sha vaqtda kichkina xetchbek bozordagi eng arzon model bo‘lgan. Shundan buyon mashina egalari uni biror marta ham ta’mirlamasdan 670 ming kilometrdan ortiq yo‘l bosdi, deb xabar beradi Motor.
Jerri va Jenis Xyuot Mitsubishi Mirage’ni 2014-yilda 13 ming dollarda sotib olgan. Besh eshikli xetchbek Amerika bozoridagi eng arzon model bo‘lgan. Avtomobilga 74 ot kuchiga ega 1,2 litrli benzin dvigatel o‘rnatilgan.
O‘tgan olti yil davomida avtomobil biror marta ham ta’mirlanmagan, faqat rejali xizmat ko‘rsatilgan xolos. 240 ming kilometr yo‘l bosganida xetchbekning g‘ildiraklari almashtirilgan va shundan so‘ng, u yana 400 ming kilometr yo‘l bosgach yangi startyor o‘rnatilgan. Mashina egasining so‘zlariga ko‘ra, xetchbekning dvigateli va transmissiyasi oldingidek ajoyib holatda.
670 ming kilometr yo‘l bosgan Jerri va Jenis navbatdagi xizmat ko‘rsatishga Mitsubishi’ning rasmiy dilerlik markaziga borgan. Avtomobilning bu qadar ko‘p yo‘l bosganini ko‘rgan mutaxassislar rekordchi-xetchbekdan reklama kampaniyalarida foydalanish uchun sotib olish taklifini bildirgan. Diler buning o‘rniga yangi Mirage’ni juftlikka katta chegirma bilan sotgan.
Avvalroq BMW million kilometr yo‘l bosgan sedanini namoyish etgan edi.
Izoh (0)