Kanadaning Edmonton shahrida yashovchi fuqaro “Forsaj” kinofranshizasida suratga tushgan mashinalarning nusxalaridan iborat noyob kolleksiyani to‘pladi. Ayni vaqtda u kolleksioner ixtiyorida 24 ta avtomobil mavjud, deb xabar beradi Motor.
Avtomobillar egasining so‘zlariga ko‘ra, u o‘z kolleksiyasini yig‘ishni uch yil oldin boshlagan. Kinofranshizadagi birinchi nusxa yorqin yashil rangli Mitsubishi Eclipse bo‘lib, u “Forsaj”ning ikkinchi qismida suratga tushgan. Tayyor avtomobil erkakka shu qadar yoqib qolganidan u ushbu franshizaning barcha qismlaridagi modellarni yig‘ishni davom ettirgan. Shunday qilib, tez orada uning dala hovlisida “Forsaj 4”dagi bosh qahramon Pol Uoker boshqargan Nissan Skyline R34 GT-R Bayside Blue paydo bo‘lgan.
Keyinroq avtoparkda “Forsaj”ning birinchi qismidagi to‘q sariq rangli Toyota Supra nusxasi paydo bo‘lgan. Kolleksioner sport kupe uchun 185 ming dollar to‘lagan. Bundan tashqari, erkak “Tokio drifti”dagi Mazda RX-7’ni, Vin Dizel qahramoni haydagan Dodge Charger’ni, modifikatsiyaga uchragan oq Volkswagen Jetta va Mitsubishi Lancer Evolution VII’ni sotib olgan. Kolleksiya egasi jami 24 ta kino-avtomobillar nusxasini yig‘ishga muvaffaq bo‘lgan. Erkak modellarning aksariyatini Yaponiyadan buyurtma qilgan, biroq ayrim nusxalarni ustaxonasida shaxsan o‘zi yasagan.
Kolleksionerning so‘zlariga ko‘ra, u erishilgan natijada to‘xtab qolish niyatida emas. Yaqin vaqt ichida erkak “Forsaj”ning ikkinchi qismi bilan tanilgan pushti Honda S2000’ni sotib olish niyatida. Kanadalikning rejasiga ko‘ra, u jami 35 ta avtomobilni yig‘ishni rejalashtirgan.
Avvalroq “Forsaj”ning hali ekran yuzini ko‘rmagan qismida suratga tushgan Ford Mustang Mach 1 sotuvga qo‘yilgani to‘g‘risida xabar berilgandi.
Izoh (0)