AQSh qirg‘oqlari yaqinida ichida 4 mingdan ortiq Hyundai va Kia avtomobillar bo‘lgan MV Golden Ray yuk kemasini arralash boshlandi, deb xabar beradi The Drive. Shuningdek, yuk kemasi ichida Chevrolet mashinalari va Ram pikaplari ham bor. Avtovozning qirqilgan qismlari keyinroq maxsus barjalar yordamida qirg‘oqqa olib chiqiladi.
Kadrlardan ko‘rish mumkinki, yuk kemasi ichidagi ko‘plab yangi avtomobillar ham arralab tashlangan. Qutqaruvchilar ushbu mashinalarni quruqlikka olib chiqish juda qiyin bo‘ladi deb hisoblagan.
Zanjirli arralar Versaber kompaniyasi tomonidan qurilgan ulkan VB 10000 ko‘tarma kraniga o‘rnatilgan. Ikkita barja yordamida harakatga keladigan ushbu mashina 2010-yilda to‘fon oqibatida zarar ko‘rgan neft platformalarini utilizatsiya qilish maqsadida yaratilgan. Kran 7,5 ming tonnagacha yukni ko‘tara oladi. Platformalarning har biri to‘rttadan dvigatelga ega.
Yuk kemasi jami sakkiz bo‘lakka bo‘linadi. Har birining og‘irligi 2700 dan 4100 tonnagacha yetadi.
Eslatib o‘tamiz, Janubiy Koreyaning Hyundai Mipo Dockyard kompaniyasi tomonidan yaratilgan MV Golden Ray yuk kemasi 2019-yilning 8-sentabridan buyon Jorjiya shtatidagi Bransuik porti yaqinida yotibdi. Kema orqali bir necha ming Hyundai va Kia avtomobillari Baltimorga tashilayotgan bo‘lgan, biroq noma’lum sabablarga ko‘ra, kema portdan chiqqanidan 23 daqiqa o‘tib ag‘darilib ketgan. Ayrim ma’lumotlarga ko‘ra, bu yukning noto‘g‘ri joylashtirilishi sabab yuzaga kelgan. Hyundai versiyasi bo‘yicha esa kemada yong‘in sodir bo‘lgan.
Izoh (0)