Fransiya poytaxti Parij shahrida koronavirusga qarshi kurash choralari doirasida yopilgan Eyfel minorasi 2020-yilning dekabr oyi o‘rtasidan o‘z ishini qayta tiklaydi. Bu haqda “Interfaks” xabar berdi.
Minoraning faoliyati uchun mas’ul bo‘lgan kompaniya tomonidan ma’lum qilinishicha, 16-dekabrdan boshlab minora tashrif buyuruvchilar uchun soat 10:30 dan 18:30 gacha ochiq bo‘ladi.
Dunyodagi sayyohlar eng ko‘p tashrif buyuradigan yodgorliklardan biri bo‘lgan minorada pandemiya sharoitida qo‘shimcha xavfsizlik choralari amal qiladi — majburiy niqob taqish, tashrif buyuruvchilar sonidagi cheklov va har kunlik dezinfeksiya.
Fransiyada cheklovlar yumshatilishining ikkinchi bosqichi doirasida 15-dekabrdan muzeylar va madaniy obyektlar sanitar-epidemiologik tartiblarga amal qilgan holda o‘z ishini qayta tiklaydi.
Pandemiya boshidan buyon Fransiyada koronavirus bilan kasallanish bo‘yicha 2,2 milliondan ortiq holat qayd etilgan. Shuningdek, 52 mingdan ortiq odam kasallik qurboniga aylangan.
Eslatib o‘tamiz, koronavirusning birinchi to‘lqini vaqtida yopilgan Eyfel minorasi 3 oylik tanaffusdan keyin 25-iyun kuni sayyohlar va parijliklar uchun ochilgandi.
Izoh (0)