Litvaning Yonav tumanidagi qorako‘zanlar yetishtiruvchi Danmink fermasi koronavirus tarqalishini to‘xtatish uchun taxminan 40 mingta qorako‘zanni yo‘q qiladi. Bu haqda “Interfaks” xabar berdi.
Litvaning Davlat oziq-ovqat va veterinariya xizmati ma’lumotlariga ko‘ra, fermada o‘tgan haftadan buyon koronavirus bilan kasallangan 1,2 mingdan ortiq qorako‘zan nobud bo‘lgan, yana 600 ta qo‘rako‘zan yo‘q qilingan. Yonav tumanida 30-noyabrdan boshlab ekstremal holat joriy qilingan. Bu holat korxonalarga yo‘q qilingan qorako‘zanlar uchun tovon to‘lashga imkon beradi.
Tuman mas’ullarining ma’lum qilishicha, hozircha qorako‘zan fermalarida koronavirus tarqalishining oldini olish bo‘yicha aniq sxema mavjud emas. Bu Litvadagi birinchi holat hisoblanadi, shu sababli rasmiylar virus va uning hayvonlar orasida tarqalishi haqida iloji boricha ko‘proq ma’lumot to‘plashga urinmoqda.
Qayd etilishicha, ekstremal holat aholiga taalluqli emas, barcha choralar koronavirus aniqlangan xo‘jaliklarga qaratilgan.
Davlat oziq-ovqat va veterinariya xizmati ma’lumotlariga ko‘ra, fermada koronavirus aniqlangan vaqtda u yerda 59 mingdan ortiq qorako‘zan saqlanayotgandi. 40 mingta qorako‘zan yo‘q qilinganidan keyin qolganlari keyinchalik ularni yetishtirishni davom ettirish uchun saqlab qolinadi.
Danmink fermasining to‘rt nafar ishchisida koronavirus aniqlangan, yana bir necha kishi karantinga olingan.
O‘tgan haftada Radvilishkis tumanidagi yana bir qorako‘zan fermasining ikki nafar ishchisida koronavirus aniqlangan. Fermadagi barcha 50 mingta qorako‘zan 27-noyabrda yo‘q qilingan, biroq bu virus sababli emas, balki qorako‘zanlarning ma’lum yoshga yetganligi sababli amalga oshirilgan va bu odatiy texnologik jarayon hisoblanadi.
Dastlab Daniya, keyinroq Ispaniya, Italiya, AQSh, Niderlandiya, Shvetsiya va Gretsiyada qorako‘zanlarda koronavirus aniqlangach, Litvada profilaktika maqsadida qorako‘zanlar koronavirusga tekshirilgan.
Daniya hukumati noyabr oyining boshida koronavirus qorako‘zanlarda mutatsiyaga uchraganini va mazkur mutatsiya kelajakdagi COVID-19’ga qarshi har qanday vaksinaning kuchini yo‘qqa chiqarishi mumkinligini ma’lum qilgandi.
Davlat oziq-ovqat va veterinariya xizmati ma’lumotlariga ko‘ra, ayni paytda Litvadagi 86 ta fermada 1,6 millionta qorako‘zan saqlanmoqda.
Eslatib o‘tamiz, 4-noyabr kuni Daniya hukumati hayvonlarda koronavirus infeksiyasini keltirib chiqaradigan SARS-CoV-2 virusi mutatsiyasiga uchraganidan keyin mamlakatdagi barcha fermer xo‘jaliklarida qorako‘zanlar yo‘q qilinishini ma’lum qildi. Daniyadagi fermalarda koronavirus bilan kasallangan barcha qorako‘zanlar yo‘q qilinishi ortidan mamlakat oziq-ovqat, qishloq xo‘jaligi va baliq xo‘jaligi vaziri Mogens Yensen o‘z lavozimini tark etishini e’lon qildi. Avvalroq u ba’zi fermer xo‘jaliklarida hayvonlarda koronavirus mutatsiyasi aniqlanganligi sababli mamlakatda yetishtirilgan qorako‘zanlarni yo‘q qilish to‘g‘risidagi qaror noto‘g‘ri bo‘lganligini tan olgandi.
Izoh (0)