AQSh Markaziy razvedka boshqarmasining sobiq xodimi Edvard Snouden Amerika pasportini saqlagan holda Rossiya fuqaroligini olishni rejalashtirmoqda. Bu haqda uning advokati Anatoliy Kucherena ma’lum qildi, deb yozmoqda “Interfaks”.
Advokatning aytishicha, Snouden AQSh pasportini saqlab qolgan holda Rossiya fuqaroligini olishga qaror qilgan, Rossiya qonunchiligi esa bunga imkon beradi.
Kucherenaning bildirishicha, Edvard Snouden hafta oxirigacha Rossiyaning tegishli organlariga topshirish uchun barcha zarur hujjatlarni to‘plashi kerak. “Men unga barcha zarur hujjatlar ro‘yxatini jo‘natdim. O‘ylaymanki, hafta oxirigacha u barcha hujjatlarni to‘playdi va biz fuqarolikni olish haqida ariza beramiz”, — deya qo‘shimcha qilgan advokat.
Advokatning qayd etishicha, amerikalik sobiq agentning Rossiya fuqaroligini olishi yo‘lida to‘siq ko‘rmayapti. “Edvard Rossiyada besh yildan ortiq yashadi, unda muddatsiz doimiy yashash huquqi bor”, — deya tushuntirish bergan Kucherena.
Advokatning so‘zlariga ko‘ra, Rossiya fuqaroligini olish uchun zarur bo‘lgan rus tilini bilish darajasi bo‘yicha Snoudenda muammo yo‘q.
Edvard Snouden 2020-yilning oktabr oyida Rossiyada muddatsiz doimiy yashash huquqini olgandi va Rossiya fuqaroligini olish haqida o‘ylayotgandi, chunki u rafiqasi bilan yaqinda farzandli bo‘ladi va ularning farzandi tug‘ilishi bilan Rossiya fuqaroligini oladi.
Eslatib o‘tamiz, Edvard Snouden 2013-yilda ommaviy axborot vositalariga AQSh maxsus xizmatlarining butun dunyoni kuzatuvchi dasturlari haqida ma’lumot taqdim etgan. AQShda Snoudenga nisbatan sirtdan josuslik va davlat mulkini o‘g‘irlash ayblovlari e’lon qilingan.
Snouden dastlab AQShdan Gonkongga, keyin esa Rossiyaga qochib ketgan. Shundan buyon u Rossiyada vaqti-vaqti bilan yashash huquqini uzaytirib yashab kelayotgandi.
Izoh (0)