O‘zbekiston dekabr oyida Yevrosiyo iqtisodiy ittifoqida (YeOII) kuzatuvchi-davlat maqomiga ega bo‘ladi. Bu haqda Rossiya Sanoat va savdo vazirligi departamenti direktori Mixail Anisimovga tayanib, “Gazeta.uz” xabar berdi.
“Bundan tashqari, dekabr oyida O‘zbekistonga rasman Yevrosiyo iqtisodiy ittifoqida kuzatuvchi bo‘lish maqomi beriladi. Umid qilamizki, O‘zbekiston bilan yangi ‘Yevrosiyo beshligi’ formatida yo‘lga qo‘yiladigan hamkorlik yangi turtki va rivojlanishga olib keladi”, — deydi Anisimov.
17-noyabr kuni Oliy Majlis Senati raisining o‘rinbosari Sodiq Safoyev Atlantika kengashidagi chiqishi davomida O‘zbekistonning Jahon savdo tashkilotiga a’zo bo‘lishi jamoatchilik orasida YeOIIga a’zo bo‘lishdan ko‘ra kamroq bahslarni yuzaga keltirayotganini ma’lum qilgandi. Shu sababli bu masala ochiqligicha qolmoqda.
May oyida Senat ko‘pchilik ovoz bilan O‘zbekistonning kuzatuvchi davlat sifatida Yevropa ittifoqi bilan hamkorligini ma’qullagan. 71 senator “qo‘shilaman”, 16 nafari “qarshi” ovoz berdi, 4 kishi esa betaraf qoldi.
Eslatib o‘tamiz, Prezident Shavkat Mirziyoyev yanvarda parlamentga yo‘llagan Murojaatnomasida ushbu masala hukumat tomonidan parlament muhokamasiga kiritilishi va xalq vakillari bilan batafsil ko‘rib chiqilishini ma’lum qilgan edi. Mart oyining boshlarida esa O‘zbekiston YeOIIga kuzatuvchi-davlat maqomida qo‘shilishi ma’lum bo‘lgandi.
Izoh (0)