Shavkat Mirziyoyev — Yevrosiyo iqtisodiy ittifoqi bilan hamkorlik haqida: “Xalq vakillari nima desa shu bo‘ladi”

O‘zbekiston Prezidenti Shavkat Mirziyoyev Oliy Majlisga Murojaatnomasi vaqtida Yevrosiyo iqtisodiy ittifoqi (YeOII) bilan hamkorlik munosabatlari haqida to‘xtalib o‘tdi.

Prezidentning ta’kidlashicha, aholi daromadlarini oshirish, qo‘shimcha ish o‘rinlari yaratish, mahsulot ishlab chiqarishni ko‘paytirish uchun O‘zbekistonga yangi-yangi bozorlar kerak, buning uchun bozor iqtisodiyoti va davr talablariga mos ko‘plab qonun va qarorlar qabul qilinyapti ham. “Lekin, afsuski, ularni ijro qiladigan ko‘pgina amaldorlar hali ham eskicha ish uslubi, rasmiyatchilik va befarqlikdan qutulgani yo‘q”, — dedi davlat rahbari.

Shavkat Mirziyoyevning so‘zlariga ko‘ra, jahon ishlab chiqarish zanjirlariga, dunyo bozori talablariga va iqtisodiy integratsiya jarayonlariga “hamohang bo‘lishimiz lozim”. “Muloqot va raqobatga tayyor bo‘lish uchun tarmoq rahbarlari o‘z ustida tinimsiz ishlashi shart. Mana, nima uchun bizga iqtisodiy integratsiya kerak!”, — deya ta’kidladi Prezident va, shu o‘rinda, Yevrosiyo iqtisodiy ittifoqi bilan hamkorlik masalalariga to‘xtalib o‘tdi.

Ta’kidlanishicha, O‘zbekistondan tashqi savdoga chiqadigan yuklarning 80 foizi Qozog‘iston, Qirg‘iziston va Rossiyaning tranzit yo‘laklari orqali o‘tadi. Shuningdek, O‘zbekiston tayyor mahsulotlari eksporti 50 foizi, ayrim tovarlar bo‘yicha esa 80 foizi Rossiya, Qozog‘iston, Qirg‘iziston hissasiga to‘g‘ri keladi.

“Ana shu omillarni inobatga olib hamda Rossiya va Qozog‘istonga ishlash uchun borgan fuqarolarimizga qulay shart-sharoit yaratish maqsadida, bugungi kunda O‘zbekistonning Yevroosiyo iqtisodiy ittifoqi bilan hamkorlik qilish bilan bog‘liq masalalar o‘rganilmoqda”, — deya ma’lum qildi Shavkat Mirziyoyev.

“Biz, albatta, ushbu jiddiy masalada, eng avvalo, xalqimizning manfaatlaridan kelib chiqib, ularning xohish-irodasiga tayanamiz. Shuning uchun xalq vakillari bo‘lgan deputat va senatorlarimiz parlament palatalarida mazkur masalani atroflicha muhokama qilib, o‘z zimmalariga mas’uliyatni olgan holda, asoslangan xulosalarini aytishlari kerak”, — deya qo‘shimcha qildi davlat rahbari.

O‘z navbatida, Shavkat Mirziyoyev Vazirlar Mahkamasiga ushbu yo‘nalishdagi tahliliy va kompleks baholash ishlarini yakunlab, tegishli xulosa va takliflarni Oliy Majlis palatalariga taqdim etish haqida ko‘rsatma berdi.

“Shu bilan birga, biz Jahon savdo tashkiloti bilan boshlangan muloqotimizni, hamda Yevropa Ittifoqi bilan Hamkorlik va sheriklik to‘g‘risidagi yangi bitimni tuzish bo‘yicha ishlarni izchil davom ettiramiz. Shuningdek, biz boshqa xalqaro va mintaqaviy iqtisodiy tashkilotlardagi ishtirokimizni, yanada kuchaytiramiz”, — deb qayd etib o‘tdi Prezident Shavkat Mirziyoyev.