Ўзбекистон декабрь ойида Евросиё иқтисодий иттифоқида (ЕОИИ) кузатувчи-давлат мақомига эга бўлади. Бу ҳақда Россия Саноат ва савдо вазирлиги департаменти директори Михаил Анисимовга таяниб, «Gazeta.uz» хабар берди.
«Бундан ташқари, декабрь ойида Ўзбекистонга расман Евросиё иқтисодий иттифоқида кузатувчи бўлиш мақоми берилади. Умид қиламизки, Ўзбекистон билан янги ‘Евросиё бешлиги’ форматида йўлга қўйиладиган ҳамкорлик янги туртки ва ривожланишга олиб келади», — дейди Анисимов.
17 ноябрь куни Олий Мажлис Сенати раисининг ўринбосари Содиқ Сафоев Атлантика кенгашидаги чиқиши давомида Ўзбекистоннинг Жаҳон савдо ташкилотига аъзо бўлиши жамоатчилик орасида ЕОИИга аъзо бўлишдан кўра камроқ баҳсларни юзага келтираётганини маълум қилганди. Шу сабабли бу масала очиқлигича қолмоқда.
Май ойида Сенат кўпчилик овоз билан Ўзбекистоннинг кузатувчи давлат сифатида Европа иттифоқи билан ҳамкорлигини маъқуллаган. 71 сенатор «қўшиламан», 16 нафари «қарши» овоз берди, 4 киши эса бетараф қолди.
Эслатиб ўтамиз, Президент Шавкат Мирзиёев январда парламентга йўллаган Мурожаатномасида ушбу масала ҳукумат томонидан парламент муҳокамасига киритилиши ва халқ вакиллари билан батафсил кўриб чиқилишини маълум қилган эди. Март ойининг бошларида эса Ўзбекистон ЕОИИга кузатувчи-давлат мақомида қўшилиши маълум бўлганди.
Изоҳ (0)