Davlat xavfsizlik xizmati va Ichki ishlar vazirligi xodimlari tomonidan o‘tkazilgan tezkor tadbirlar davomida O‘zbekiston fuqarolarini yollab, Suriyadagi “Tavhid va jihod katibasi” xalqaro terrorchilik tashkiloti safiga jo‘natishda gumon qilinayotgan shaxs qo‘lga olindi, deya xabar bermoqda vazirlik matbuot xizmati.
Ma’lum qilinishicha, 1996-yil Samarqand viloyatida tug‘ilgan O.Hoshimov 2019-yilda Misrda o‘qishi davomida xalqaro terrorchilik tashkiloti rahnamolarining g‘oyaviy ta’siriga tushib qolgan. O.Hoshimov u yerga O‘zbekistondan diniy ta’lim olish maqsadida borgan yoshlar orasida o‘zining aqidaparastlik g‘oyalarini targ‘ib qilgan hamda Suriya davlati hududida faoliyat olib borayotgan “Tavhid va jihod katibasi” xalqaro terrorchilik tashkilotining safiga qo‘shilishga da’vat qilib, ularni tashkilotning safiga yuborish bilan shug‘ullanib kelgan.
Ushlangan shaxsning uyali telefoni xotirasida ekstremistik mazmundagi materiallar mavjudligi aniqlanib, protsessual tartibda olib qo‘yilgan.
Hozirda ushbu shaxsga nisbatan Jinoyat kodeksining tegishli moddalari bilan jinoyat ishi qo‘zg‘atilib, tergov-tezkor harakatlari olib borilmoqda.
Ma’lumot uchun, Oliy sudning 2016-yil 26-sentabrdagi qarori bilan “Tavhid va jihod katibasi” xalqaro terrorchilik tashkiloti faoliyati O‘zbekiston hududida taqiqlangan tashkilotlar ro‘yxatiga kiritilgan.
Avvalroq Rossiyada terakt uyushtirishni rejalashtirgan jangarilar O‘zbekiston fuqarolari bo‘lgani, Navoiyda “Odnoklassniki” orqali diniy-ekstremistik materiallar tarqatgan 26 yoshli yigit 3 yilga ozodlikdan cheklangani hamda Samarqandda “Hizb ut-Tahrir” terrorchilik tashkilotining 15 nafar a’zosi qo‘lga olingani haqida xabar berilgandi.
Izoh (0)