Samarqand viloyati Narpay tumanida 33 yoshli erkak spirtli ichimlik ta’sirida o‘ziga tanish bo‘lgan ayol bilan kelib chiqqan kelishmovchilik oqibatida uni kaltaklab, o‘limiga sabab bo‘ldi. Bu haqda Ichki ishlar vazirligi huzuridagi Tergov departamenti xabar berdi.
Tergov departamenti xabariga ko‘ra, 2020-yilning 27-noyabr kuni soat 22:00 da Narpay tumani “Ko‘k-ota” MFY O‘lmas qishlog‘ida yashovchi 33 yoshli fuqaro Jahonbek D. 7 nafar tanishi bilan “Ravot olchin” MFYda joylashgan umumiy ovqatlanish joyida o‘tirib, spirtli ichimlik iste’mol qilgan. Shundan so‘ng Jahonbek D. 34 yoshli tanishi Gulmira T. bilan kelib chiqqan kelishmovchilik oqibatida uni shu atrofdagi bog‘ning ichiga olib borgan va tanasining turli qismlariga qo‘li va oyoqlari bilan urib, tepib tan jarohati yetkazgan.
Shundan so‘ng Jahonbek D. tanishi Gulmira T.ga tibbiy yordam ko‘rsatish va uning hayotini saqlab qolish maqsadida tez yordam xizmatiga murojaat qilgan. Biroq Gulmira T. olgan tan jarohatlari oqibatida hodisa joyida vafot etgan.
Hodisa joyini ko‘zdan kechirish davomida marhuma Gulmira T.ning egnidagi kiyimlari ashyoviy dalil tariqasida rasmiylashtirib olingan.
Mazkur holat yuzasidan Narpay tuman IIB huzuridagi Tergov bo‘linmasi tomonidan fuqaro Jahonbek D.ga nisbatan O‘zbekiston Respublikasi Jinoyat kodeksining 104-moddasi 3-qismi “d” bandi (jabrlanuvchining o‘limiga sabab bo‘lgan qasddan badanga og‘ir shikast yetkazish) bilan jinoyat ishi qo‘zg‘atilgan.
Jinoyat ishi bo‘yicha Jahonbek D. gumon qilinuvchi tariqasida jalb qilinib, protsessual tartibda ushlangan.
Mavzuga doir:
- Navoiyda yoqtirgan qiziga gapirgan yigit bilan janjallashib unga og‘ir tan jarohati yetkazgan o‘smir qo‘lga olindi
- Angrenda ammasining qizini himoya qilgan yigit uch kishi tomonidan kaltaklandi
- Farg‘onalik yigit internet orqali tanishgan qizi unga turmushga chiqmasligini aytgani uchun qizning uyiga borib, 2 oylik chaqaloqni o‘ldirdi
- Namanganda 16 yoshli bola sevgan qiziga SMS yuborgani uchun o‘zidan bir yosh katta bolani pichoqlab o‘ldirib qo‘ydi
Izoh (0)