Andijonda qizining o‘limiga sababchi yigitdan Spark undirilmayotganligidan norozi ona prokuratura binosi oldida o‘zini yoqib yubordi

Andijon viloyatining Marhamat tumanida o‘zini osib o‘ldirgan qizning onasi uning o‘limida aybdor shaxsning Spark’ini zarar hisobiga undirib berishni talab qilib, prokuratura binosi oldida o‘zini yoqib yubordi. Bu haqda Bosh prokuratura matbuot xizmati xabar berdi.

Ma’lum bo‘lishicha, 2020-yil 24-iyul kuni soat 23:00 larda Marhamat tumani, Sadoqat ko‘chasida yashovchi 21 yoshli N.M. sevgan yigitini kutib turgan voyaga yetmagan qiz T.M.ni uyali telefoniga rasmga olib, ushbu fotosuratlarni uning ota-onasi va profilaktika inspektoriga ko‘rsatishini aytgan.

Ushbu ma’lumotlar boshqalarga oshkor bo‘lishidan qo‘rqqan qiz o‘zini osib, joniga qasd qilgan. Holat yuzasidan Jinoyat kodeksining 141-1-moddasi (shaxsiy hayot daxlsizligini buzish) bilan jinoyat ishi qo‘zg‘atilgan va hozirda tergov harakatlari olib borilmoqda.

Marhumaning onasi S.B. olib borilayotgan tergov harakatlaridan norozi bo‘lib, 2020-yil 30-noyabr kuni soat 12:15 larda Andijon viloyat prokuraturasiga kelgan va viloyat prokurorining birinchi o‘rinbosari F.Rahmonov tomonidan qabul qilingan.

Fuqaro S.B. qabul jarayonida tergovchi tomonidan ularning talablari bajarilmasdan, uning fikricha qizining vafotiga aybdor bo‘lgan N.M.dan yetkazilgan zarar hisobiga Spark avtomashinasi undirilmayotganligidan noroziligini bildirgan.

Viloyat prokurorining birinchi o‘rinbosari F.Rahmonov qabul jarayonida jinoyat ishi bo‘yicha tergov harakatlari davom etayotganligi, Spark avtomashinasini undirish tergov organlarining vakolatiga kirmasligini, tergov yakuni bo‘yicha barcha aybdor shaxslarga nisbatan qonuniy choralar ko‘rilishini tushuntirgan.

Olingan javobdan qoniqish hosil qilmagan qizning onasi S.B. Spark avtomashinasi undirilmagan taqdirda o‘ziga o‘t qo‘yib, joniga qasd qilishini bildirib, viloyat prokuraturasini tark etgan. Vaziyat keskinlashuvi va boshqa holatlarning oldini olish uchun Andijon viloyat IIB post-patrul xizmati xodimlari viloyat prokuraturasiga chaqirilgan.

Shundan so‘ng shu kuni soat 13:20 larda ayol viloyat prokuraturasi avtomashinalar turargohida baqirib, boshqa shaxslarni o‘ziga jalb qilib, turmush o‘rtog‘i X.T.dan 1 litrli plastmassa idishda bo‘lgan benzin va gugurtni olib, o‘zining yelka qismlariga quygan va turmush o‘rtog‘i X.T. dan o‘zini yoqishi va viloyat prokuraturasi binosi ichiga yugurib kirib ketishi haqida ko‘rsatma olganidan so‘ng o‘ziga o‘t qo‘yib yoqib yuborgan.

Shu vaqtda voqealar rivojini kuzatib turgan Andijon viloyat IIB post-patrul xizmati xodimlari ayolning egnida yonayotgan kiyimlari yechib olinib, uning kuyib og‘ir tan jarohati olishining oldi olingan.

Ayni vaqtda ayolning yuzi, qo‘llari, bo‘yin va ko‘krak qafasi sohalari jami tanasining 15 foiz qismi kuyish tashxisi bilan shifoxonaga joylashtirilgan.

Mazkur holat bo‘yicha Andijon shahar prokuraturasi tomonidan tergovga qadar tekshiruv harakatlari olib borilmoqda.