Abdulla Aripov ShHT davlatlarini o‘zaro parvozlarni bosqichma-bosqich tiklashga chaqirdi
O‘zbekiston koronavirus pandemiyasi sharoitida turizm va madaniy almashinuvni rivojlantirish uchun Shanxay hamkorlik tashkilotiga (ShHT) a’zo davlatlar o‘rtasidagi parvozlarni bosqichma-bosqich qayta tiklashga chaqirdi. O‘zbekiston bosh vaziri Abdulla Aripov 30-noyabr kuni ShHTga a’zo davlatlar hukumat rahbarlari kengashining onlayn majlisida tegishli bayonot bilan chiqish qildi, deb yozmoqda “Gazeta.uz”.
Abdulla Aripovning fikricha, bu jarayon koronavirus pandemiyasi sharoitida barcha sanitariya talablariga muvofiq amalga oshirilishi lozim.
O‘zbekiston hukumati rahbari, shuningdek, O‘zbekiston tomonining har yili ShHTga raislik qilayotgan mamlakat shaharlaridan birini tashkilotning turistik va madaniy poytaxti etib e’lon qilish taklifiga ham to‘xtalib o‘tdi. “Ushbu tashabbusni qo‘llab-quvvatlaganlari uchun tomonlardan minnatdor bo‘lamiz”, — deya ta’kidladi O‘zbekiston bosh vaziri.
“Shuningdek, biz 2021—2022-yillarda turizm sohasida ShHTga a’zo davlatlar hamkorligi dasturini amalga oshirish bo‘yicha qo‘shma harakatlar rejasini tez fursatlarda tasdiqlashni qo‘llab-quvvatlaymiz”, — dedi Abdulla Aripov.
Bosh vazir Samarqandda “Ipak yo‘li” xalqaro turizm universiteti tashkil etilgani va u ShHT davlatlari uchun turizm sohasida mutaxassislarni tayyorlash bo‘yicha muvofiqlashtiruvchi ta’lim muassasasiga aylanishi mumkinligini eslatib o‘tdi.
“Barcha hamkorlar va hamkasblarimizni mazkur universitet faoliyatida faol ishtirok etishga taklif etib qolamiz. Barcha mamlakatlarga qabul uchun tegishli kvotalarni ajratishga tayyormiz”, — deya qo‘shimcha qildi hukumat rahbari.
Eslatib o‘tamiz, 10-noyabr kuni O‘zbekiston Prezidenti Shavkat Mirziyoyev Shanxay hamkorlik tashkilotiga a’zo davlatlar rahbarlari kengashining videoanjuman shaklida o‘tgan majlisida nutq so‘zlagandi va bir qator takliflarni ilgari surgandi.
