Farg‘ona viloyatida internet orqali tanishgan qizi unga turmushga chiqmasligini aytgani uchun uning uyiga borib, oila a’zosi va qizni pichoqlab, uyidagi chaqaloqni o‘ldirgan yigit qo‘lga olindi. Bu haqda “Sevimli” telekanalining “Zamon.uz” ko‘rsatuvida xabar qilindi.
Ma’lum qilinishicha, Fuqaro Muhammadyusuf Mahammadjonov Instagram ijtimoiy tarmog‘i orqali tanishib, bir necha marotaba uchrashib, yoqtirib qolgan va uylanmoqchi bo‘lgan fuqaro Pirmatova 2020-yil 26-may kuni unga turmushga chiqish fikridan qaytganini aytadi.
Shundan so‘ng Mahammadjonov 2020-yil 27-may kuni soat 11:00 larda qizdan o‘ch olish maqsadida Farg‘ona shahriga kelib, uning xonadoniga eshik ochiqligidan foydalanib kirib olgach xonadon kelinining qorniga pichoq bilan zarba berib og‘ir shikast yetkazadi.
Shundan so‘ng yigit jabrlanuvchini yotoqxonaga olib kirib, yana baqirsa yoki boshqa harakatlar qilsa, pichoq bilan yana jarohatlanishini aytib qo‘rqitadi.
Keyin xonadon kelini Karimova telefon orqali qizni uyga chaqiradi. Qiz uyga kelgunga qadar Karimovaning 2020-yil 5-mart kuni tug‘ilgan 2 oylik chaqaloqni uyning mehmonxonasiga olib kirib, yig‘isidan to‘xtata olmagani sababli uni yostiq bilan dimiqtirib qasddan o‘ldiradi.
Pirmatova xonadonga yetib kelganida yigit uning yuzaga urib, pichoq bilan qorin va ko‘krak qismiga urayotganida qo‘shnisi Ibragimov eshikni taqillatib, militsiya chaqirishini aytadi. Shundan so‘ng Mahammadjonov uydan chiqib, avtomashina yuvish shoxobchasida yuz-qo‘lini yuvib, taksida Andijonga qaytib ketadi.
Muhammadyusuf Mahammadjonov Jinoyat kodeksining 97-moddasi 2-qismi “v”, “j”, “o” (boshqa biror jinoyatni yashirish yoki uning sodir etilishini osonlashtirish maqsadida o‘ta shafqatsizlik bilan aybdorga ayon bo‘lgan ojiz ahvoldagi shaxsni qasddan o‘ldirish) bandlari 25-97-moddasi 2-qismi “r” bandi va 104-moddasi 1-qismi (qasddan badanga og‘ir shikast yetkazish) bilan aybdor deb topildi. Jinoyat ishlari bo‘yicha Farg‘ona viloyati sudida uning ishi ko‘rib chiqildi. Sud hukmiga ko‘ra, fuqaro Mahammadjonovga nisbatan 20 yil muddatga ozodlikdan mahrum qilish jazosi tayinlandi.
Avvalroq Buxoroda o‘g‘rilik qilishiga xalal bergan 13 yoshli qizni bolg‘a bilan urib o‘ldirishga uringan ayol qo‘lga olingani, Toshkentda avtosaroylardan birida chiptachi avtobus haydovchisiga pichoq tiqib olgani hamda Namanganda 16 yoshli bola sevgan qiziga SMS yuborgani uchun o‘zidan bir yosh katta bolani pichoqlab o‘ldirib qo‘ygani haqida xabar berilgandi.
