Toshkent aeroportida bir qizni Birlashgan Arab Amirligining Dubay shahriga fohishalik uchun olib ketayotgan ayol qo‘lga olindi, deya xabar bermoqda IIBB axborot xizmati inspektori Jamoliddin Nasimov “Daryo”ga.
Qayd etilishicha, Aziza ismli fuqaro Toshkent shahar Ichki ishlar bosh boshqarmasi Terrorizm va ekstremizmga qarshi kurash boshqarmasi xodimlariga ariza bilan murojaat qilgan. Arizaga asosan Shahlo ismli qiz uni aldov yo‘li bilan pulini keyinchalik ishlab berish sharti asosida 3500 AQSh dollari qarz evaziga Birlashgan Arab Amirligining Dubay shahriga fohishalik bilan shug‘ullanish uchun yuborayotganini ma’lum qilgan.
Arizaga asosan Toshkent shahar IIBB Terrorizm va ekstrimizmga qarshi kurashish boshqarmasi Odam savdosi va noqonuniy migratsiya qarshi kurashish boshqarmasi xodimlari tomonidan tezkor surishtiruv va o‘rganish ishlari olib borildi. Natijada 11-noyabr soat tongi 5:30 larda Islom Karimov nomidagi Toshkent xalqaro aeroportida jabrlanuvchi 1992-yilda tug‘ilgan Aziza to‘xtatib qolindi.
Shunga asosan Toshkent shahar Bektemir tumanida tezkor tadbir o‘tkazilgan. Tadbirda arizada ko‘rsatilgan Nafisa ismli shaxs qo‘lga olingan. U Bektemir tumani IIB faoliyatini muvofiqlashtirish boshqarmasi Tergov bo‘limiga topshirildi.
“Tanishim Nafisa chet elda ish borligini aytdi. U yerda yaxshi pul topish mumkinligini aytib, qiziqtirishni boshladi. Keyin vaqt o‘tishi bilan bilsam, u yerga fohishalik bilan shug‘ullanishga jo‘natmoqchi ekan.
O‘rtog‘im bilan maslahatlashganimda u menga hozir odam savdosi bilan shug‘ullanish ko‘payib ketganini aytdi. Keyin biz Ichki ishlar xodimiga murojaat qildik. Ular qonun doirasida Nafisaga chora ko‘rdi”, – deydi jabrlanuvchi.
Surishtiruv jarayonlarida shaxsini aniqlashning imkoni bo‘lmagan. Nafisaning jinoiy sherigi, hozirda BAA da istiqomat qiluvchi xalqaro pul o‘tkazmalari orqali jabrlanuvchining bileti va xarajatlari uchun 500 AQSh dollari jo‘natgan. Buning evaziga Dubay shahrida ish boshlagandan so‘ng 3 500 AQSh dollar ishlab berishi shart sifatida ko‘rsatilgan.
Mazkur holat yuzasidan Toshkent shahar Bektemir tumani IIO faoliyatini muvofiqlashtirish boshqarmasi huzuridagi Tergov bo‘limi tomonidan Jinoyat kodeksining 135-moddasi 2-qismi “e” bandi (bir guruh shaxslar tomonidan oldindan til biriktirib odam savdosi bilan shug‘ullanish) bilan jinoyat ishi qo‘zg‘atilib, hozirda tergov harakatlari olib borilmoqda.
https://www.youtube.com/watch?v=NOIbkllJxDk&feature=youtu.be&ab_channel=Jinoyatvajazo
Avvalroq Toshkentda fohishalar guruhini internetda reklama qilib kelgan bloger ushlangani, Toshkentda O‘zbekiston va chet el fuqarolariga shahvoniy xizmatlar ko‘rsatuvchi yirik jinoiy guruh aniqlangani hamda Samarqandda 12 nafar fuqaroning pasportini olib qo‘yib, ularni 2 yil davomida fohishalik bilan shug‘ullanishga majbur qilgan ayol hibsga olingani haqida xabar berilgandi.
Izoh (0)