Rossiyada 1-dekabr soat 11:00 holatiga ko‘ra yana 26 402 kishida koronavirus aniqlandi, deb xabar bermoqda Meduza COVID-19’ga qarshi tezkor shtabga tayanib. Bu bir kun avvalgi ko‘rsatkichdan 64 kishiga ko‘p. Mamlakatda kasallanganlarning umumiy soni 2 322 056 nafarga yetdi.
Yangi aniqlangan kasallanish holatlarining eng ko‘pi Moskva (6524 ta), Sankt-Peterburg (3697 ta) shaharlarida hamda Moskva (1104 ta) va Nijegorodsk (462 ta) viloyatlarida qayd etilgan.
So‘nggi sutkada koronavirusdan 569 ta o‘lim holati qayd etilgan (bundan bir kun avval 368 kishi vafot etgandi). Bu Rossiyada sutkalik o‘lim holati bo‘yicha eng yuqori ko‘rsatkich. Bundan avvalgi rekord 26-noyabr kuni qayd etilgan, sutka davomida 524 kishi vafot etgandi.
Pandemiya davri davomida esa COVID-19 bemorlarining jami 40 468 nafari vafot etgan.
Rossiyada umumiy hisobda 1 803 467 kishi, so‘nggi sutkada esa 24 763 kishi koronavirusdan sog‘aygan. Bir kun avval 17 274 kishi tuzalgandi.
“Rospotrebnadzor” ma’lumotlariga ko‘ra, mamlakatda koronavirusni aniqlash uchun so‘nggi 24 soatda 333 mingta test o‘tkazilgan. Bu 13-oktabrdan buyon eng kam ko‘rsatkich. Bir kun avval, 30-noyabr kuni 474 ta, 29-noyabr kuni 545 mingta, 28-noyabr kuni esa 987 mingta test o‘tkazilgandi. Test olinishning nima uchun kamaygani hozircha noma’lum.
Pandemiya boshlanganidan buyon koronavirusni aniqlash uchun 76,7 millionta test o‘tkazilgan.
Jons Hopkins ma’lumotlariga ko‘ra, Rossiya koronavirus qayd etilganlar soni bo‘yicha dunyoda AQSh, Hindiston, Braziliya va Fransiyadan keyin beshinchi o‘rinda bormoqda. Ayni paytda koronavirusga chalinganlar soni dunyoda 63 milliondan oshgan.
Avvalroq Rossiyada koronavirus oqibatidagi o‘limlar bo‘yicha haqiqiy holatni “Rosstat” ma’lumotlaridan bilib olish mumkinligi, lekin u yerda ma’lumotlar juda kechikib berilishi va “Stopkoronavirus.rf” saytida ko‘rsatilgan o‘limlar soni bilan to‘g‘ri kelmasligi, ular mamlakat bo‘yicha o‘rtacha 4—5 marta ko‘proqligi ma’lum qilingandi.
Izoh (0)