Yevropa komissiyasi 30-noyabr, dushanba kuni O‘zbekiston tomonidan “GSP+” preferensiyalar bosh tizimi plyus benefitsiar mamlakati maqomini olish uchun yuborilgan ariza bo‘yicha muddatidan oldin ijobiy qaror qabul qildi, deb xabar bermoqda Investitsiyalar va tashqi savdo vazirligi matbuot xizmati.
“Qaror Yevropa komissiyasi monitoring guruhlarining O‘zbekiston inson huquqlarini himoya qilish, mehnat standartlariga rioya qilish, atrof-muhitni muhofaza qilish va samarali boshqaruv sohasidagi 27-xalqaro konvensiya talablarini bajarayotgani to‘g‘risidagi hisobotlari asosida qabul qilindi”, — deyiladi vazirlik xabarida.
O‘tkazilgan tahlillarga asoslanib, Yevropa komissiyasi mamlakat “GSP+”da ishtirok etish mezonlariga muvofiq kelishi to‘g‘risidagi xulosaga keldi va uni ushbu tizimning benefitsiarlari ro‘yxatiga kiritishni taklif qildi.
Endi mazkur qaror ko‘rib chiqish va tasdiqlash uchun Yevropa Kengashi va Yevropa parlamentiga havola etiladi. Qaror tasdiqlangandan so‘ng O‘zbekiston ishlab chiqaruvchilari va eksportchilari o‘z mahsulotlarini Yevropa bozoriga eksport qilishda bir tomonlama tarif imtiyozlaridan foydalanishni boshlashlari mumkin bo‘ladi.
Shunda O‘zbekiston ishlab chiqaruvchilari YeI mamlakatlariga eksport qilishlari mumkin bo‘lgan tovar pozitsiyalarining soni 6200 gacha oshadi. Bu hozirgi kundagiga qaraganda ikki baravar ko‘p.
Hozirda O‘zbekiston preferensiyalarning asosiy dasturidan (GSP) foydalanmoqda. Unga ko‘ra, O‘zbekiston Yevropa Ittifoqiga bojxona to‘lovlarisiz 3000 ta tovar pozitsiyalarini va kamaytirilgan stavkalar asosida 3200 ta tovar pozitsiyalarini yuborishi mumkin.
Izoh (0)