Европа комиссияси 30 ноябрь, душанба куни Ўзбекистон томонидан «GSP+» преференциялар бош тизими плюс бенефициар мамлакати мақомини олиш учун юборилган ариза бўйича муддатидан олдин ижобий қарор қабул қилди, деб хабар бермоқда Инвестициялар ва ташқи савдо вазирлиги матбуот хизмати.
Тегишли ҳужжат ЕИ комиссияси раиси Урсула фон дер Ляйен томонидан имзоланган.
«Қарор Европа комиссияси мониторинг гуруҳларининг Ўзбекистон инсон ҳуқуқларини ҳимоя қилиш, меҳнат стандартларига риоя қилиш, атроф-муҳитни муҳофаза қилиш ва самарали бошқарув соҳасидаги 27-халқаро конвенция талабларини бажараётгани тўғрисидаги ҳисоботлари асосида қабул қилинди», — дейилади вазирлик хабарида.
Ўтказилган таҳлилларга асосланиб, Европа комиссияси мамлакат «GSP+»да иштирок этиш мезонларига мувофиқ келиши тўғрисидаги хулосага келди ва уни ушбу тизимнинг бенефициарлари рўйхатига киритишни таклиф қилди.
Энди мазкур қарор кўриб чиқиш ва тасдиқлаш учун Европа Кенгаши ва Европа парламентига ҳавола этилади. Қарор тасдиқлангандан сўнг Ўзбекистон ишлаб чиқарувчилари ва экспортчилари ўз маҳсулотларини Европа бозорига экспорт қилишда бир томонлама тариф имтиёзларидан фойдаланишни бошлашлари мумкин бўлади.
Шунда Ўзбекистон ишлаб чиқарувчилари ЕИ мамлакатларига экспорт қилишлари мумкин бўлган товар позицияларининг сони 6200 гача ошади. Бу ҳозирги кундагига қараганда икки баравар кўп.
Ҳозирда Ўзбекистон преференцияларнинг асосий дастуридан (GSP) фойдаланмоқда. Унга кўра, Ўзбекистон Европа Иттифоқига божхона тўловларисиз 3000 та товар позицияларини ва камайтирилган ставкалар асосида 3200 та товар позицияларини юбориши мумкин.
Изоҳ (0)