Shavkat Mirziyoyev 1-dekabr kuni elboshi Nursulton Nazarboyev bilan telefon orqali muloqot qilib, uni va Qozog‘iston xalqini Qozog‘iston Respublikasi birinchi prezidenti kuni bilan tabrikladi.
Prezident matbuot xizmatining yozishicha, Shavkat Mirziyoyev elboshining zamonaviy Qozog‘istonni barpo etish va izchil rivojlantirish, mamlakatning xalqaro maydondagi nufuzini oshirishdagi tarixiy roli, shuningdek, Markaziy Osiyo mintaqasida do‘stlik va yaxshi qo‘shnichilik munosabatlarini mustahkamlashga qo‘shgan katta hissasini alohida qayd etdi.
Ikki mamlakat yetakchilari O‘zbekiston va Qozog‘iston o‘rtasidagi strategik sheriklik, o‘zaro ishonch va qo‘llab-quvvatlash prinsiplariga asoslangan ko‘p qirrali munosabatlarning bugungi darajasini yuqori baholadi. Xalqaro va mintaqaviy ahamiyatga molik dolzarb masalalar yuzasidan ham fikr almashildi.
O‘zbekiston Prezidenti, shuningdek, Qozog‘iston prezidenti Qosim-Jo‘mart To‘qayev bilan ham muloqot o‘tkazdi. Davlat rahbari uni birinchi prezident kuni bilan samimiy qutlab, tinchlik, farovonlik va ravnaq tiladi.
Suhbat chog‘ida O‘zbekiston va Qozog‘iston o‘rtasidagi do‘stlik, yaxshi qo‘shnichilik va strategik sheriklik munosabatlarini mustahkamlashning dolzarb masalalari ko‘rib chiqildi. Amaliy hamkorlikka oid qo‘shma loyiha va dasturlarni, avvalo, savdo-iqtisodiy, investitsiyaviy va gumanitar sohalarda ilgari surishga alohida e’tibor qaratildi.
Prezidentlar xalqaro kun tartibini, jumladan, shu oyda O‘zbekiston raisligida bo‘lib o‘tadigan MDH sammitiga tayyorgarlik ko‘rish masalalarini ham muhokama qildi. Hamdo‘stlik va boshqa mintaqaviy hamda global tuzilmalar doirasidagi yaqin muloqotni davom ettirishga tayyor ekanliklarini ta’kidladi.
Bundan avval Shavkat Mirziyoyev Rossiya prezidenti Vladimir Putin bilan telefon orqali muloqot qilib, COVID-19’ga qarshi Rossiya vaksinasini muhokama qilgani xabar berilgan edi.
Izoh (0)