Butun dunyoda bir hafta ichida yangi koronavirus infeksiyasi bilan kasallanish holatlarining soni sentabr oyining boshidan beri birinchi marta kamaydi. Bu haqda Jahon sog‘liqni saqlash tashkiloti (JSST) bosh direktori Tedros Gebreyesus aytib o‘tdi, deb yozmoqda Meduza.
Gebreyesusning so‘zlariga ko‘ra, Yevropaning aksariyat mamlakatlarida ko‘rilgan “qattiq, ammo zarur choralar” tufayli kasallanish darajasining pasayishi kuzatilgan.
Shu bilan birga, Gebreyesus boshqa mintaqalarda kasallanishning o‘sishi davom etayotganini ta’kidladi.
Yevropada oktabr oyining oxiridan noyabr oyining boshigacha aksariyat davlatlar u yoki bu shaklda milliy cheklovlar e’lon qildi. Koronavirusga qarshi kurash choralari doirasida ta’lim muassasalari yopildi, kafe va restoranlarning ishi cheklandi, ayrim mamlakatlarda komendantlik soati joriy etildi.
Kuchli cheklovlar fonida Ispaniya, Fransiya, Belgiyada kunlik kasallanish oktabr oyining oxirida eng yuqori ko‘rsatkichlardan 3—5 baravar, Buyuk Britaniya va Italiyada 1,5 baravar kamaydi, Germaniyada o‘sish to‘xtadi va vaziyat barqarorlashdi.
Dunyoda koronavirus bilan kasallanishning rekord ko‘rsatkichi 13-noyabrda qayd etilgan — 662 mingdan ortiq holat. So‘nggi kunlarda har kuni 600 mingdan kam yangi holat qayd etilgan.
Izoh (0)