Moderna коронавирусга қарши вакцинани қўллаш учун шошилинч тартибда ариза берди

Американинг Moderna фармацевтик компанияси АҚШ озиқ-овқатлар ва дорилар сифати устидан санитар назорат бошқармаси (FDA)га ўз вакцинасини коронавирус инфекциясига қарши қўллашни маъқуллаш учун ариза берди.  Бу ҳақда «РБК» компания Twitter’ига таяниб хабар бермоқда.

«Moderna маълумотлари mRNA-1273 вакцинасидан фойдаланишни шошилинч авторизация қилиш сўрови учун FDA’га йўналтирилди», — дейилади баёнотда.

Аввалроқ FDA Moderna’нинг аризаси 17 декабрь, бошқарманинг вакциналар ва улар билан боғлиқ биологик маҳсулотлар бўйича маҳсулот қўмитасининг мажлиси куни кўриб чиқилишини маълум қилган эди. Аммо тиббий регулятор вакцина қандай муддатда маъқулланиши ҳақида айтмаган эди.

Компания раҳбари Стефан Бансель коронавирус инфекциясига қарши вакцинанинг ҳар битта дозаси 25 доллардан 37 долларгача бўлишини маълум қилди. Унинг сўзларига кўра, якуний нарх буюртмачига зарур бўлган партия ҳажмига боғлиқ бўлади. «COVID-19’га чалинган оғир беморларни даволаш соғлиқни сақлаш тизимига қанчага тушаётганини ҳисобга олганда, бу адолатли нарх. Биз максимал даромад олишга қизиққанимиз йўқ», — дея аниқлик киритди Бансель.

Компания вакцина самарадорлигини дастлабки таҳлилда 94,1 фоиз, касалликнинг оғир ҳолатларида эса 100 фоиз деб баҳолади.

21 ноябрь куни АҚШда Pfizer фармацевтика компанияси ҳам 94 фоиз самарадорликка эга вакцинасини рўйхатдан ўтказиш учун ариза берганди.