Avstraliyaning Adelaida shahri yaqinida ichida haydovchisi bo‘lgan avtomobil kutilmaganda paydo bo‘lgan o‘raga tushib ketdi, deb xabar beradi Yahoo News.
29-noyabr kuni kechasi 21 yoshli haydovchi boshqaruvidagi Toyota Camry avtomobili yo‘lda hosil bo‘lgan karst o‘rasiga tushib ketgan.
Karst o‘rasi — suvda eruvchan tog‘ jinslari (ohaktosh, dolomit, gips, qisman tuz, bor)ning yerosti (qisman yerusti) suvlari ta’sirida erib kеtishidan hosil bo‘ladigan chuqurlik.
Hodisa joyiga yetib kelgan politsiyachilar transport vositasi suv va loyga to‘lgan chuqurga yarmigacha kirib ketganiga duch kelgan.
Ko‘cha yopib qo‘yilgan va politsiyachilar “Suvsoz” xodimlarini yordamga chaqirgan. Keyinroq huquq-tartibot organi xodimlari Facebook’dagi sahifasi orqali yarmigacha cho‘kib ketgan avtomobil surati bilan bo‘lishgan.
Mashina o‘radan chiqarib olingan va hodisa joyidan olib ketilgan. Haydovchiga hech qanday shikast yetmagan. Yo‘ldagi ta’mirlash ishlari yakunlanguniga qadar atrofdagi 30 dan ortiq uy suvdan vaqtincha uzilgan. Sodir bo‘lgan voqeadan so‘ng ko‘chadagi harakatlar qayta tiklangan yoki tiklanmagani noma’lum.
Izoh (0)