Wild Bird xayriya fondining sobiq menejeri Eriel Kordova-Roxas o‘zining 30 yoshini Jamaika Bay Wildlife qo‘riqxonasida nishonlashga qaror qildi. U rang-barang tabiat va qushlarni tomosha qilishdan zavqlanishni rejalashtirgan edi, ammo Eriel tasodifan kasal oqqushga duch kelganidan so‘ng barchasi o‘zgardi. Ayol qushni bu holda tashlab ketolmadi. Uni tekshiruvdan o‘tkazishga qaror qildi va qush u taxmin qilganidek oyoqda turolmaydigan bo‘lib chiqdi.
Eriel o‘ylab ham o‘tirmasdan 8 kilogrammli oqqushni qo‘liga oldi. Unga yordam berishi uchun esa shu og‘irlik bilan 2 kilometr bosib o‘tishi kerak edi. Eriel avtoturargohga yetib borganida begona haydovchi uni eng yaqin metro stansiyasiga olib borishga rozi bo‘ldi.
Bir necha soatdan so‘ng Eriel oqqush bilan shifokorga yetib bordi. Unga infeksiya va zaharlanish tashxisi qo‘yildi. Veterinarning so‘zlariga ko‘ra, Eriel vaqtida qushni olib kelmaganida, u vafot etishi ham mumkin edi.
Oqqushga Bey deb ism berildi va u hozirda o‘zini yaxshi his qilmoqda. Davolanish kursi va karantindan so‘ng oqqush umumiy hovuzga qo‘yib yuboriladi, u allaqachon o‘ziga do‘stlar topib ulgurgan.
“Men oqqushni shifoxonaga olib kelganimda u o‘rnidan turolmasdi. U juda zaif va ozg‘in edi”, − eslaydi qiz. – Endi esa u dumini silkitib, ahvoli yaxshi ekanligini ko‘rsatmoqda”.
Eriel tug‘ilgan kunini shu tarzda nishonlashni rejalashtirmagan edi. Lekin u qilgan ishidan xursand. Hayvonlarga yordam berish uning hayotida azaldan bo‘lgan. Beyning tasodifan topib olinishi esa u uchun kutilmagan sovg‘a bo‘ldi.
Mavzuga doir:
- Britaniyalik pianinochi Tailanddagi makakalarga pandemiya stressini yengishda yordam berish uchun konsert qo‘ydi (video)
- Meksikada cho‘kib ketmaslik uchun panjaraga osilib turgan labrador dengizchilar tomonidan qutqarildi (video)
- Soch bo‘yashi natijasida jiddiy kasallikka chalingan angliyalik ayolning hayotini uning iti qutqarib qoldi
Izoh (0)