UzAuto Motors AJ Shveysariyaning Credit Suisse AG kompaniyasi bilan 150 million yevrolik xalqaro sindikatlashgan kredit to‘g‘risida kelishuv imzoladi. Bu haqda UzAuto Motors matbuot xizmati xabar berdi.
Sindikatlashgan kredit – bu bir necha banklar tomonidan yirik investitsiya loyihalarini birgalikda kreditlash degani. Unga jalb qilingan mablag‘lar loyihalarni moliyalashtirishga, tovar-material zaxiralari uchun to‘lovlarga, ishni bajarish va xizmat ko‘rsatishga, shuningdek, boshqa maqsadlarga yo‘naltirilishi mumkin.
Ushbu kelishuv bo‘yicha jalb qilingan mablag‘lar UzAuto Motors AJning investitsion loyihalarini moliyalashtirish, zavodni modernizatsiya qilish va texnik jihatdan ta’minlash hamda aylanma mablag‘larini oshirishga yo‘naltiriladi.
Kompaniyaning ma’lum qilishicha, ushbu investitsion loyihalarning amalga oshirilishi kompaniyaga General Motors yangi modellarini GEM platformasida ishlab chiqarishga yordam beradi.
Kompaniya xalqaro sindikatlashgan kreditni olishga birinchi bor ishtirok etmoqda. 2019-yilning avgust oyida “Qishloq qurilish bank” shu kabi kreditni olgan O‘zbekistondagi birinchi bankka aylangandi.
Avvalroq UzAuto Motors 2020-yil davomida yarim trillion so‘mdan ortiq yig‘imni budjetga to‘lamagani ma’lum bo‘lgandi.
Izoh (0)