Hyundai Motor Group tarkibiga kiruvchi Genesis markasi GV70 krossoveriga o‘rnatiladigan yangi biometrik identifikatsiya texnologiyasini e’lon qildi. Uning yordamida avtoturargoh va yoqilg‘i quyish shoxobchalarida to‘lovlarni amalga oshirish, shuningdek, dvigatel va shaxsiy sozlamalarni faollashtirish mumkin, deb xabar beradi Motor.
In-vehicle Easy Payment Genesis CarPay Interlocking Fingerprint Authentication System nomini olgan texnologiya dvigatelni o‘t oldirish tugmasi ostiga o‘rnatilgan barmoq izi datchigi hisoblanadi. Uning yordamida Genesis CarPay to‘lov tizimi orqali identifikatsiyadan o‘tish, shuningdek, Valte Mode servis rejimi orqali turli xizmatlarga to‘lovlarni amalga oshirish mumkin.
Eng muhimi — barmoq izi skaneri yordamida avtomobil dvigatelini, shuningdek, shaxsiy sozlamalarni faollashtirish mumkin: rul, o‘rindiq va displey proyeksiyasining holatini, multimedia ovozi hamda navigatsion tizimdagi so‘nggi marshrutni.
Daktiloskopik datchik — Genesis GV70’ning yagona yangiligi emas. Krossover yo‘lovchilarga orqa o‘rindiqlar haqida eslatib turuvchi Rear Occupand Alert (ROA) tizimi imkoniyatlarini kengaytiruvchi radar sensor bilan ham jihozlanadi. Endilikda ROA nafaqat qo‘l va oyoqning, balki ko‘krak qafasining ham harakatlarini payqay oladi — masalan, tizim uxlayotgan yoki uyg‘ongan chaqaloq haqida ma’lumot beradi. Shuningdek, Advanced-ROA hayvonlarni “ko‘ra oladi”.
Genesis GV70 krossoveri oktabr oxirida taqdim etilgandi. Model 2,5 litrli Theta III benzin dvigatel, 3,5 litrli motor va 2,2 litrli dizel yordamida harakatga keladi. Barcha agregatlar sakkiz pog‘onali uzatmalar qutisi yordamida boshqariladi.
Avvalroq Hyundai kompaniyasi Toyota Land Cruiser’ga raqobatchi yaratishni rejalashtirayotgani to‘g‘risida xabar berilgandi.
Izoh (0)