Ford GT’ning bosh dizayneri o‘zining ijod namunasini sotuvga qo‘ydi

Ford GT superkari dizaynining muallifi Morey Kellum o‘ziga tegishli avtomobilni Skots Velli shahrida sotuvga qo‘ydi, deb xabar beradi Motor.

Ford kompaniyasi GT modelini xarid qilish jarayonini maksimal darajada murakkablashtirgan — modelni shunchaki dilerning oldiga borib, 500 ming dollar to‘lab, olib ketish mumkin emas. Superkarning barcha potensial xaridorlari marka rahbariyati bilan bir necha bosqichdan iborat suhbatlardan o‘tishi lozim. Shuningdek, Ford chayqovchilikning oldini olish maqsadida model egalari bilan maxsus bitim imzolagan bo‘lib, unga ko‘ra, avtomobil xarid qilinganidan boshlab ikki yil davomida uni sotish mumkin emas. GT jami 1350 nusxada yaratilgan bo‘lib, ularning barchasi allaqachon sotib bo‘lingan. Endilikda ikkilamchi bozorda ilk superkarlar paydo bo‘lmoqda.

Ular orasida eng diqqatga sazovori — 2017-yilda yaratilgan Liquid Red Metallic qizil rangiga bo‘yalgan superkar hisoblanadi: u ikkinchi avlod modelining tashqi ko‘rinishini yaratgan insonga tegishli. Ford GT bosh dizayneri o‘z ijod namunasini sotuvga qo‘ygan, biroq Morey Kellum buni nima sababdan amalga oshirgani noma’lum. Avtomobil ajoyib holatda saqlangan bo‘lib, hozirga qadar 328 kilometr yo‘l bosgan. Dizayner sotuvga qo‘yilgan model narxini faqat xaridorlarga ma’lum qilishga tayyor.

Avvalroq “60 soniya ichida olib qochish” filmidagi “Eleonor” Ford Mustang’i o‘ziga yangi xo‘jayin qidirayotgani to‘g‘risida xabar berilgandi.