Namanganda piyodaning o‘limiga sababchi bo‘lgan Spark haydovchisi voqea joyidan qochib ketdi (video)

Namangan shahrida yo‘lni kesib o‘tayotgan ayolni urib yuborgan Spark haydovchisi qo‘lga olindi. Bu haqda IIV axborot xizmati xabar berdi.

Ma’lumotlarga ko‘ra, 16-noyabr kuni soat 21:25 larda Namangan shahrining “Do‘stlik” buyum bozori avtomobil qatnov yo‘lida Spark mashinasi yo‘lni kesib o‘tayotgan piyodalardan birini urib yuborib, voqea joyidan qochib ketgan.

Jabrlanuvchi shifoxonaga olib ketilayotgan paytda, yo‘lda vafot etgan.

Hudud kuzatuv kameralari yordamida avtomobilning rusumi aniqlanib, IIB tomonidan “to‘sib ushlash” hamkorlikdagi rejasi amalga oshirilgan.

Natijada Spark avtomobili egasining yashash manzili bo‘yicha olingan ma’lumotlar asosida fuqaro qo‘lga olingan. “Haydovchi IIBga topshirilgan, mashina esa vaqtinchalik jarima maydoniga joylashtirilgan. Haydovchiga nisbatan hozirda tergov ishlari olib borilmoqda”, — deyiladi xabarda.

Aniqlanishicha, avariya sababchisi bo‘lgan haydovchi Toshkentdagi tashkilot nomida bo‘lgan avtomobilni tegishli hujjatlarsiz boshqargan.

Avvalroq Xorazmda mast haydovchilardan biri jazodan qochish uchun suvga tushib olgani, yana biri supa tagiga berkingani, Surxondaryoda dadasi spirtli ichimlik ichgani sabab 13 yoshli bolaning mashina haydashga majbur bo‘lgani, Toshkent viloyatining Zangiota tumanida mast haydovchi YPX xodimlaridan qochib, jo‘xori poyalari ichiga yashiringani haqida xabarlar berilgandi.