Наманган шаҳрида йўлни кесиб ўтаётган аёлни уриб юборган Spark ҳайдовчиси қўлга олинди. Бу ҳақда ИИВ ахборот хизмати хабар берди.
Маълумотларга кўра, 16 ноябрь куни соат 21:25 ларда Наманган шаҳрининг «Дўстлик» буюм бозори автомобиль қатнов йўлида Spark машинаси йўлни кесиб ўтаётган пиёдалардан бирини уриб юбориб, воқеа жойидан қочиб кетган.
Жабрланувчи шифохонага олиб кетилаётган пайтда, йўлда вафот этган.
Ҳудуд кузатув камералари ёрдамида автомобилнинг русуми аниқланиб, ИИБ томонидан «тўсиб ушлаш» ҳамкорликдаги режаси амалга оширилган.
Натижада Spark автомобили эгасининг яшаш манзили бўйича олинган маълумотлар асосида фуқаро қўлга олинган. «Ҳайдовчи ИИБга топширилган, машина эса вақтинчалик жарима майдонига жойлаштирилган. Ҳайдовчига нисбатан ҳозирда тергов ишлари олиб борилмоқда», — дейилади хабарда.
Аниқланишича, авария сабабчиси бўлган ҳайдовчи Тошкентдаги ташкилот номида бўлган автомобилни тегишли ҳужжатларсиз бошқарган.
Аввалроқ Хоразмда маст ҳайдовчилардан бири жазодан қочиш учун сувга тушиб олгани, яна бири супа тагига беркингани, Сурхондарёда дадаси спиртли ичимлик ичгани сабаб 13 ёшли боланинг машина ҳайдашга мажбур бўлгани, Тошкент вилоятининг Зангиота туманида маст ҳайдовчи ЙПХ ходимларидан қочиб, жўхори поялари ичига яширингани ҳақида хабарлар берилганди.
Изоҳ (0)