Rossiyaning Tula shahrida 1992-yilda ishlab chiqarilgan va hozirga qadar 480 kilometr yo‘l bosgan “ZAZ-968MD” sotuvga qo‘yildi. Deyarli ideal holatdagi noyob “Zaporojets”ni ikkita iPhone 12 Pro narxiga — 200 ming rublga (2600 dollar) xarid qilish mumkin, deb xabar beradi Motor.
“ZAZ-968MD” modifikatsiyasi 1960-yillar o‘rtasidan 1994-yilga qadar ishlab chiqarilgan. “Zaporojets” imkoniyati cheklangan insonlar uchun rul ostidagi tutqichlar yordamida rul boshqaruvi bilan jihozlangan. Avtomobilda faqat “mufta” va tormoz tepkilari bor. Shu turdagi modellarning aksariyati ijtimoiy xizmatlar orqali tarqatilgan.
Sotuvga qo‘yilgan nusxa deyarli ideal holatda. Faqat uzoq yillar garajda saqlangani sabab paydo bo‘lgan “zamburug‘lar” hisobga olinmasa, model kuzovi biror bir nuqsonsiz. Avtomobil interyeri jigarrang sun’iy charm bilan qoplangan, oynasida esa “Nogiron” etiketkasi saqlanib turibdi. Odometrga ko‘ra, mashina 28 yil davomida 480 kilometr yo‘l bosgan xolos.
Orqa uzatmali “ZAZ-968MD” 42 ot kuchiga ega 1,2 litrli benzin dvigatel yordamida harakatga keladi. Agregat to‘rt pog‘onali mexanik uzatmalar qutisi yordamida boshqariladi. Sotuvchi “vaqt kapsulasi”ni 200 ming rublga baholagan.
Avvalroq Moskvada Mazda bazasida yaratilgan “Zaporojets” sotuvga qo‘yilgani, shuningdek, 34 yil garajda turgan “Zaparojets” 6500 dollarga baholangani to‘g‘risida xabar berilgandi.
Izoh (0)